Serekê YNKyî Bafil Talabanîyî mesaj şawit Komxebata Lozanî ya ke hetê Merkezê Cigêrayîşanê Stratejîkan ê Rojawanî (NRLS) ra  yena kerdene.

Talabanî seba ke tewrê komxebate bîyo keyfweşîya xo ard ziwan û mesajê xo wend. Mesajê Talabanîyî wina yo:

"100 serrî verî kurdî her hetî ra qirkerdişî rî bi rî mendî. Nê pêkerdişî vera kurdan, cografyaya kurdan û kulturê kurdan ameyî îmzakerdene. Kurdan tim semedê pawitişê heqanê xo têkoşîn kerd. La çi heyf ke bîyî qûrbanê menfeatê serdestan.  La no şar rixmê cîyakerdişî payra mend û bi xoverdayîşî cografyaya xo pawit.

Dişmen tim keno ke Kurdîstanî îşxal bikero û tarîxê şarî çîn bikero. La wa no dişmen bizano ke şarê kurdî do sey koyanê Kurdîstanî tim berz de bimano, teslîm mebo.  Wa heme hêzê dinya bizanê ke şer waştişê ma nîyo û ma vera şerî yê.

Hedefê ma o yo ke tim ma cografyaya xo de azad û birumet biciwîyê. Nê semedê dî ra ma sey YNKyî semedê yewîya neteweyî ya ke waştişê Mam Celalî yo, xebatanê xo domnenê. Ma şarê kurdî rê vanê ke no proses, prosesê yewkerdişê refanê xo yo."

Talabanîyî veng da ke wa her kes semedê menfeatê dewaya xo fîkranê xo yê sîyasîyan bikero yew.