Endamê Heyetê Îmraliyî yo verên Îdrîs Balukenî derheqê vengdayîşê tarîxî yê Rayber Apoyî yê 27ê sibate de ajansê ma rê qisey kerd. Qiseykerdişê Balûkenî ra tay nuqtayî wina yê:

''Rayberê Şarê Kurdî Birêz Ocalanî badê 26 serran têkoşînê demokrasî, haştîye û azadîye yê şarê kurdî fîna rojdemê Rojhelatê Mîyanênî û dinya. No gerek bi perspektîfê tarîxî bêro destgirewtene. 26 serrî verî bi komployê mîyanneteweyîyî ame waştene ke bêro tesfîyekerdene û şar û rêxistina xo ra bêro raqilnayene. Dima ra Îmrali de sîstemê îşkenceyê giranî de mend.

La rixmê nînan Birêz Ocalan îradeyê azadîye, demokrasî û haştîye heta roja ma ard û fîna merkezê sîyasetê herêmî û globalî. No tabloyêkê zaf muhîmî mojneno ma. Mesajêko zaf gird vejîya werte ke no manîfestîyêk o. Eke samîmî bêro nîzdîbîyayene çareserîya haştîye û demokrasî ke Birêz Ocalanî kerda werte semedê Rojhelatê Mîyanênî beranê prosesêkê neweyî akena.

Xeyrê xebatanê polîtîkan ê  Birêz Ocalanî de şarêko ziwan, kultur û nasnameyê ci çîn hesibyayêne newera vejîya sehneyê tarîxî. Birêz Ocalan rixmo ke 26 serrê xo yê peyênî zîndan de ravêrnayî peyser game nêeşte, eqsê ci de bi fîkranê xo yê neweyan têkoşîn hêzdar kerd. Coka şarê kurdî semedê Birêz Ocalanî teredut nêkeno. Şarê kurdî pîya bi awanîyanê xo yê rêxistinkerdeyan zano ke sey verî ewro zî û ewro ra tepîya zî Birêz Ocalan prosesî raşt îrdare keno. Şarê ma zaf hol zano ke prosesê muzakeran ke Birêz Ocalan tede yo şarê kurdî vîn nêkeno.

Ge-ge hamleyê stratejîkî yê Birêz Ocalanî cade nînê famkerdene la gama ke prosesê aver şino, yeno vînayene ke hemleyê ci senî erjîyaye yê. Gerek manîfestoyê Birêz Ocalanî bi perspektîfê tarîxî bêro erjnayene. Nê prosesî de sere de dewlete gerek her kes berpirsîyarîya xo bîyaro ca. Eke her kes berpirsîyarîya xo ya prosesî bigîro xo ser hemleya Birêz Ocalanî ke demê dergî de do welatî bixelisno eşkena demê kilmî de zî tesîrê xo ramojno.''