Barîna kobanêyije ya ke qirkerdişê Berxbotanî de vazdayê qîrayîşê şarî, têkoşînê Kobanê ke sey kelaya xoverdayîşî tarîxî de nameyê xo nuşt, cayê xo girewt. 40 rojî têkoşînê cuya da, wird çimê xo vînî kerdî.

Barînê Kobanê 2014 de tewrê Şorişê Rojawanî bîye. O wext semedê pakkerdişê dewanê Kobanê Hamleya Şehîd Gelhat û Herêma Cizîre de zî Hemlaya Şehîd Rûbar Qamişloyî dewam kerdêne.

Barîna ke gama ke xebera azadkerdişê Girê Sipî vila bîyêne pêkewtişê xo yê verênî ciwîyaye, wina qala o prosesî kerd: ''Mi do reya verêne vernîye sefan de ca bigrewtêne. Pîya bi nê keyfî xebera azadkerdişê Girê Sipî ameye. Hinî mabênê Kobanê û Herêma Cizîre de asteng nêmendbi. Hêzê YPG-YPJ yê wird kantonan do biamêyene yew ca û bi merasîmê biheybet şayî bikerdêne û bi konvoyî takvîye bişiyênê Kobanê. Perûne waştene badê azadkerdişî Kobanê bivînê.

Kobanê hinî bajarêko bimbarek bi ke bi gonîya şehîdan amebi awedayene. Ma badê 5 saetan resayî Kobanê. Banî rijnayebî û boyê barûtî ameyêne. Tecrubeyê mi yê şerî zaf kêmbi. Ez hema pede-pede embazan ra musayêne. Hetêkî ra pêkewtişî hetê bînî ra ma mewzîyî viraştêne. Her kes zaf qeflîyayêne. Ge-ge hewteyêk ma nêkewtêne. Proseso wina giran bi, her firsat de çeteyan cehd kerdêne bikewê zere.

25ê hezîrane de rojêka germe de fermandarê/a vat 'çeteyî  kewtî Kobanê, qirkerdiş…' o germ-kilij de ma cade kewtê rayîrê dewa Berxbotanî ke çeteyî kewtê de. Hela ke ma resayî dewe hema tay çeteyî ûca bî. Çeteyan cinî, doman nêvatêne guleyî varnayêne. Çeteyan kincê YPG û asayîşî kerdî piray û kewtbî dewe û dewijî yew bi yew keyeyanê ci de qetil kerdbî. Şarî cayê çeteyan mojna ma, bi paştdayîşê dewijan çeteyî ameyî îmhakerdene. Qirkerdişê dewa Berxbotanî de 233 sîvîlî ameyî qetilkerdene û tewr tay 273 sîvîlî birîndar bîyî. Seba ke ma wextê ci de şar nêpawit zerrîya ma deja.

Prosesê azadkerdişê Sirînî dewam kerdêne û mi zî tîya cayê xo girewt. Geme bi game ma aver şîyêne. Dişmen seba ke verê ma bîgêro heme îmkan û metodê xo şuxulnayêne. Bitaybetî mayînî cakerdêne. Cayo ke ma tede bî pê mayinanê înan dekerde bi. Her roje ma bineyna aver şîyêne. Ma gamê xo bi tedbîrî eştêne, dormeyê ma pê mayinan amebi girewtene.  Mi verê xo de mayin dî. Ez ey ravîyarta mi kabloyêk dî. Ez agêraya ke embazan hîşyar bikerî, embazêk payna kabloyî û têdima mayînî teqayî. Çimê mi anêbîyênî. Mi destê xo na çimanê xo ya, destê mi bîyî hî. Ez hîşyar bîya nêweşxane de ya. 40 rojî ravîyartî, mi wird çimê xo vînî kerdbî. Toz û dumano ke badê teqayîşî vejîya hinî xo tarî de nimitêne.''