Vervatoxê Rêxistina Heqanê Merdiman a Efrînî Îbrahîm Şêxo komîteya amadekarîye ya Forumê Efrînî yê 2. de ca gêno. Şêxoyî ANFyî rê hedefê forumî û kerdişê îşxalî ercnayî.

Şêxoyî da zanayene ke dewleta tirke pêro xetê telefon, înternet û têkilîye girewtî binê kontrolê xo û bi nê hawayî kena ke vengê Efrînî nêreso dinya. Şêxoyî vat: ''Merdimê ke Efrînî ra şîyî Şehba tersenê ke çîyêk vajê. Çunke hema zî tay şinasê înan Efrîn de yê. Efrîn de zî hemwelatîyî neçare yê ke xeta tirkan bixebitnê la ê xetî zî yenê goşdarîkerdene.''

Îbrahîm Şêxoyî eşkera kerd ke netîcenameyê Forumê Efrînî yê Yewînî de înan veng dabi dewlet, hêz û rêxistinanê mîyanneteweyîyan la qet yew kes cewab nêda înan.Şêxoyî vat:''Sere de Rûsya, Amerîka xeylêk hêzê mîyanneteweyî vera hêrişan bêveng mendî. Coka dewleta tirke hîna giran hêrişê xo yê weşîyî zêdînayî. Dewleta tirke ferdê pêro keyeyan tepişena, cinîyan remnena, vera şarê Efrînî wehşîtîye û sûcan kena û her roje nê sûcî zêdîyenê. Wextê îşxalî de tewr tay 300 hezar efrînijî pê zorî dîyayî koçkerdene û herinda înan de ereb û tirkmenî ameyî cakerdene. Nameyê kuçe, tax û dewî vurîyayî bîyî tirkî. Her ca de fotografê Erdogan û alaya tirkan esta. Her ca de PTT esto''

Îbrahîm Şêxoyî bale ante ser ke dewleta tirke hemkaranê xo ENKSî rê zî teda û îşkence kena û vat: ''Terefgîranê ENKSî wextê îşxalî de hetkarîya tirkan kerde. La dewleta tirke ê zî kerdî hedef. Ewro ENKS Efrîn de wayîrê vateyêkî nîyo. Têna Tirkîya Efrîn îdare kena.''

Şêxoyî pare kerd ke efrînijî yenê remnayene û Tirkîya de yenê hukmkerdene. Şêxoyî wina dewam kerd: ''Efrîn de 3 serran de tewr tay 7 hezar û 300 kesî ameyî remnayene. Nêmeyê înan zîndananê Tirkîya de yê û cezaya girane dîyaye înan.''

Şêxoyî derheqê hedefanê Forumî de wina vat: ''No forumo 2. têkoşînê Efînî yê kurdan xo xurtêr bikero. Ma do forum de tay biran bigêrê û seba caardişê nê biran komîteyêke awan bikerê. Ma do dezgeh û rêxistinanê mîyanneteweyîyan reyde têkilîya xo xurtêr bikerê ke wehşetê dewleta tirke bidê eşnawitene û seba ke îşxal biqedo ma do xebatan bikerê.''