Seba ke dewleta tirke destur  nêda cenazayê rojnamegeranê Cîhane Bîlgîn û Nazim Daştanî bêrê welatê înan dîya zanayene ke cenazayî do Rojawan de bêrê definkerdene.

OHDyî ra avûkat Resul Temurî ke cuwa ver avûkatîya Nazim Daştanî kerdbî, vat destur nêdayîşê ardişê cenazayan huqûqî nîyo. Avûkat Temurî wina vat: ''Ê nêeşekenê semedê nê astengkerdişî belgeyêkê fermî bidê. Heqê her kesî est o ke memletê xo de hetê merdimanê xo ra bêro definkerdene. Dewaya winayênan de Mehkemeya Heqanê Merdiman a Ewropa na rewşe sey bêhurmetîya vera cuyeya taybete qebul kerda û vat no binpaykerdişê heqan o. Definkerdişê merdimanê xo û dima ra sîyagiredayîş semedê komelî rituelê xatiwaştişî yo. Dewlete bi vergirewtişê nê xatirwaştişî vera merdeyî dişmenîya xo domnena.''