Sereka Heyetê Cinîyan ê Îdareyê Xoserî yê Rojawanî Cîhane Xidro ANFyî rê derheqê rewşa cinîyan ê herême de qisey kerd.

Cîhane pare kerd ke Rojawan de cinîyî her dezgeh de wezîfe kenê û vat: ''Xora modelê Rojawanî projeyê cinîyan bi. Coka tewr zaf cinîyî yenê hedefkerdene. Sere de Cebhet El Nûsra û DAÎŞ pêro cergê dewleta tirke cinîyan kenê hedef û wazenê şexsê cinîyan de îradeyê komelî bişiknê. Ê armanc kenê ke komel de hîşmendîya xo ya serê cinîyan ronê.''

Cîhane îfade kerd ke xorinbîyayîşê krîzê Sûrîye de bara Tirkîya zaf a û vat: ''Dewleta tirke Cerablus, Bab, Ezaz, Efrîn, Girê Spî û Serêkaniyê îşxal kerdî. Nê herêman de kultur, exlaq û demografî vurnayî û vera cinîyan şîdet, tacîz, tecawuz, kerdişê xirabî, remnayîş yenê kerdene. Nê herêman de bi desan cinîyî vînîbîyaye û kişte yê. Dinya vera kerdişanê Tirkîya bêveng a. 

Destpêkê 2021î ra nata Rojawan de şîdetê vera cinîyan zêdîya. Herêmê ma tim binê hedefê hêrişanê Tirkîya de yê. DAÎŞ zî xîret keno ke herême de hîşmendîya xo vila bikero. Wextêkî ra nata zî Korona ra semed herême de karantîna esta. Merdimê meçarî ra keye de manenê. No zî beno sebeb ke şîdetê zereyê keyeyî bizêdîyo.''

Cîhane Xidro da zanayene ke ê sey Îdareyê Xoserî yê Rojawanî seba vergirewtişê şîdetî ray projeyan amade kenê û vat: ''Ma seba cinîyan qanûnan do virazê. Nê qanûnî pêro komel de do bêrê caardene. Ma do mîyanê komelî de perwerdeyê seba cinîyan, keyeyan û camêrdan bikerê. Pê rayîrê nê perwerdeyan ma wazenê komelî hîna hişmend bikerê.''