Endamanê Yewîya Cinîyan ê Ciwanan ê Minbic û Reqa hêrişê îşxalî yê dewleta tirke yê vera Zap, Avaşîn û Metîna şermezar kerdî.

Minbic: Bi desan cinîyî Minbic de kom bîyî û nînan ra Endama Îdareyê Yewîya Cinîyan ê Ciwanan Sîdana Henûş eşkerayîye wende. Sîdana Henûş da zanayene ke ê nê hêrişanê vera Herêmanê Pawitişî yê Medya şermezar kenê ke armancê înan şiknayîşê îradeyê kurdan o. Eşkerayîye de bale ameye antene peymana serê Şingalî ser û venga hukmatê Iraqî ame dayene ke peymane betal bikero. Cinîyan peynîya eşkerayîye de îfade kerd ke ê paştî danê xoverdayîşê gerîlayan.

Reqa: Reqa de zî Endama Îdareyê Yewîya Cinîyan ê Ciwanan Maya El Hemed eşkerayîye wende û ard ziwan ke Erdogan vera pêro kurdan sîyasetê çimternayîşî ano ca. Cinîyan pare kerd ke ê teslîmgirewtiş û milwarardiş qebul nêkenê û do tim rêçê şehîdan ser de bibê.