Şirnex û Amed de cinîyan seba  Gulîzare Yildiza ke bi barbarî ameye qetilkerdene çalakîyî kerdî.

Qezaya Silopîya ya Şirnexî de cinîyan rayraşîyayîş kerd. Wekîlê DEM Partî Bêrîtane Guneş û George Aslan, Hemşaredara Mêrdînî Devrîme Demîr, endamê TJA yê Mêrdînî, Sêr û Şirnexî, îdarekarê DEM Partî û DBPyî, Mayê Haştîye û xeylê cinîyê bînî bi pankarta ‘Qirkerdişê cinîyan polîtîk o’ tewrê rayraşîyayîşî bîyî. 

Hemsereka ÎHDyî ya Şirnexî Esîne Yilmaz tîya de eşkerayîye wende û pare kerd ke hinî tehamulê cinîyan nêmendo. Esîne vat: ‘’Ma çend reyî waşt ke wa Peymana Îstanbulî apey bêra caardene. Seba ke cinîyî bipawîyê ganî cezaya tewr girane bêra dayene cinîyan ê kiştoxan. Ma pêro Gulîzar ê.’’

Endama TJA Adalete Fîdan zî îfade kerd ke Gulîzare bi metodanê DAÎŞî ameya qetilkerdene.

Wekîle Bêrîtane ard ziwan ke ê do tim vera qetilkerdişê cinîyan xo ver bidê.

Dadî û waya Gulîzare zî waşt ke wa cezaya tewr girane bêra dayene kiştoxî.

Çalakîye bi sloganê “Jin, Jiyan, Azadî” qedîyaye.

Amed de serkêşîya Platformê Cinîyan ê Dîcle-Amedî û Torra Vera Şîdetî de cinîyan rayraşîyayîş kerd. Hemşaredara Amedî Serra Bucak, hemşaredarê qezayan û xeylê cinîyî tewrê rayraşîyayîşî bîyî. Cinîyan Meydanê Şêx Seîdî de zî eşkerayîye daye. Sekretera Egitim Senî ya Amedî Arzu Koç eşkerayîye wende û vat: ‘’No qetilkerdiş netîceya bêcezaverdayîşî û ferasetê camêrdan o. Betalkerdişê Peymana Îstanbulî û Qanûnê 6284î cinîyan bêpawitiş verdeno. Gulîzare cinîyêka têkoşere bîye, zîndan de mendibî. Qetilkerdişê aye têkoşînê cinîyan rê darbe ya.’’

Çalakîye bi sloganê “Jin, Jiyan, Azadî” qedîyaye.