Perwerdeyê kurdkî yo ke bi Şorişê Rojawanî Cizîre de ame destpêkerdene bêmabên dewam keno. Sazîya Ziwanê Kurdkî (SZK) û Heyetê Perwerdeyî bi xebeta hempare çarçeweya mufredatê Îdareyê Xoserî yê Rojawanî de perwerdeyê verê mektebî, mektebê verên, mektebê mîyanên, lîse û unîversîte danê. Hezar 782 mekteban de 200 hezar wendekarî perwerde vînenî. 16 hezar mamosteyî wezîfe kenê. Heyetê Perwerdeyî bi serran o  cehd kena ke sîstemê perwedeyî de kêmasî mevejîyo.

Hemsereka Heyetê Perwerdeyî yê Cizîre Gulîstane Îsmaîla ke ANFyî rê qisey kerd, vist vîrî ke Şorişê Rojawanî de game verênî semedê ziwanî erzîyayî û nê vatî: ''SZKyî rolo gird kay kerd û game bi geme bi pîl.  Dima ra Heyetê Perwerdeyî ame ronayene û semedê nê zî dezgehê mufredatî ame ronayene. Mufredatê mektebê verên, mîyanên û lîse ameyî hazirkerdene. Heme mufredatî hîrê ziwan ra yê; kurdkî, erebkî û sûryankî.  Her kes ziwanê xo de perwerde vîneno. Sinifa 4ine ra dima her mektebî de ziwanê bînî zî yenê dayene.  Domanî eşkenê ziwananê bînan bivîjnê. Her mamoste branşê xo de ders dano. Mamosteyê sinifan est ê. Mekteban de heme domanê Rojawanî pîya yê. Yanî semedê her ziwanî mektebo cîya çîn o. Eynî mektebî de her kes sinifanê cîyayan de ziwanê xo de perwerde vîneno.''

Gulîstane vist vîrî ke bi serran o herême binê ambargo, ablûqa û hêrişanê sîstemîtkan de ya û nê tesîrê perwedeyî keno û wina dewam kerd: ''Domanî, keyeyî û mamosteyî tengayîya tewr pîlê hêrişanê bêmabênan ê dewleta tirke ra ancenê. Bitaybetî mektebê ke herêmanê sînorî de yê domanî wexto derg mektebanê xo ra dûrî manenê. Domanî tim bi tersî şinê mekteb. Mesele xeta Zîrgan û Til Temirî de herêmê ke binê îşxalê dewleta tirke de yê têna 40-50 mektebî mendî. Mektebê ke xeta cephe de yê domanî mebûr manenê ke mektebî ra dûrî de bimanê. Ma cehd kenê ke domanan ser zaf tesîr mekero, ê problemanê psîkolojîkan meciwîyê. Gama ke dewlete tirke binawanî hedef girewt, problemê sey ceyran  û mazotî ciwîyayî, heme îmkanî semedê mekteban ameyî şuxulnayene.  Reyna zî tengayî est a. Bitaybetî êyê ke kampan de ciwîyenê, dilab tengayî ancenê.''