Cinîyê kurdî bi taybetî cinîyê Rojawanî hedefê hêrişanê DAÎŞ û dewleta tirke de yê. Hêrişanê îşxalî yê vera Efrîn, Girê Sipî û Serêkanîyê de bi hezaran cinîyî maruzê kerdişan dewleta tirke û cerganê ci bîyî. Efrîn de tewr tay 67 cinîyî ameyî qetilkerdene, 68 cinîyan rê tecawuz ameyî kerdene. Tewr peyên DAÎŞî 22ê çeleyî de Hesekê de 2 cinîyê îdarekarî yê erebî qetil kerdî.

Endama Dîwanê Hemserekîye yê PYDyî Foza Yûsif derheqê mesele de ANFyî rê qisey kerd.

Foza Yûsif îfade kerd ke dewleta tirke dişmena cinîyan û Şorişê Rojawanî ya. Foza vat: ''Semedo ke rayberîya cinîyan de Şorişê Rojawanî ame kerdene û Îdareyo Xoser ame ronayene dewleta tirke dişmenîya cinîyan kena û hêrişê cinîyan kena. Dewleta tirke qestî ra cinîyanê serkêşan qetil kena. Dewleta tirke û DAÎŞ cinîyan ra û hêzê cinîyan ra tersenê. Wazenê pê hêrişan cinîyan qels bikerê. Cinîyê erebî zî vera DAÎŞ, dewleta tirke û cerganê bînan hetê Îdareyê Xoserî de ca gênê û wezîfe kenê. Hêzê cinîyan ê ereban her ke şino beno pîlêr. Coka nê hêrişkerî cinîyan ê ereban kenê hedef La cinîyî binê sîwana Îdareyê Xoserî de xo rêxistin kenê, têkoşînê xo aver benê û qet apey game nêrzenê.''

Foza Yûsif ard ziwan ke vera hêrişanê dewleta tirke cewabo tewr weş pawitişê şoriş û destkewteyanê cinîyan o. Foza vat: ''Geşkerdişê rêxistinîye, çalakî û azadîya cinîyan seba xebata ma sereke ya. Cayê embazanê ma yê şehîdan veng nêmaneno. Ganî dişmen bizano ke ê nêeşkenê îradeyê cinîyan bişiknê. Îdareyo Xoser ê Rojawanî seba pêro dinya bîyo hêvî. Ma venga pêro cinîyanê dinya danê ke dormeyê Şorişê Rojawanî de wa bêrê pêser û sîstemê cinîyan bipawê.''