Dewleta tirke Efrîn de Şehîdgehê Avesta Xabûr xira kerdbi û tira cenazayê şehîdan vetbî. Nêrazîbîyayîşê vera kerdişê dewleta tirke zêdîyeno. Dadîya Şehîd Şîyar Zagrosî zî vera kerdişê tirke nêrazîbîyayîşê xo mojna.

Dadîya Şehîd Şîyar Zagrosî bale ante xoverdayîşê Efrînî ser û vat: ''Lajê mi Şîyarî û embazanê ci Efrîn de xo ver da. Dewleta tirke no ard ma ser. Dewletanê bînan vengê xo nêkerd û paştî daye Tirkîya. Îşxalê Efrînî bes nêbi nika zî goristanê ma ame talankerdene. Yew zî zûr kenê û vanê nê goristanî de cenazayê ke PYD û PKKyî qir kerdê estê. Ma ê şehîdî pê destê xo defin kerdî. Ma televîzyon de dî ke cenazayê domananê ma ameyî vetene. Erdoganî Efrîn de xeylêk sûcê şerî kerdî. Erdogan do hesabê ney bido. Rayber Apo Îmrali de ma zî tîya de xo ver danê. Heta ke o azad nêbo Efrîn zî azad nêbeno.''

Waya Şehîd Şîyar Zagrosî zî da zanayene ke Erdogan û cergânê ci Efrîn de çîyêk nêverdayo û vat: ''Înan têna Goristanê Şehîde Avesta Xabur nê Goristanê Metîna û Qazikliyî zî xera kerdî û cenazayê ma diznayî. Ma birayê xo pê destê xo defin kerd. Erdogan û cergê ci şehîdanê ma ra çita wazenê? Xerakerdişê goristanê şehîdan bêexlaqî û sûc o. Ma do abigêrê şaristananê xo û goranê xo newe ra virazê. Ma heta peyêne rêçê şehîdanê xo ser bê.''