Operasyonê Hêzê Sûrîye yê Demokratîkî (QSD) ke seba xelesnayîşê şaristanekê Hecînî dabi destpêkerdene dewam keno. Şerwanî rixmê şertanê xiraban ê hewayî de operasyonê xo domnenê. Seke roja ewilêne ya şorişî ra şarê Vakur û Rojakewtena Sûrîye zî paştîdayîşê xo yê seba şerwanan domnenê.

Mihemed Hemoyo ke westayê motoran o zî wextêko derg o hemleyan mîyan de yo û vano ke ê bi meslekê xo şorişî rê havile kenê. Hemoyî vat: “Wesayîtê ke hemleyan de yenê şuxulnayene leze xeripîyenê. Berdişê înan ê merkezê bajarî zî zehmet o, na yewe ra ma zî peyê cepheyî de tamîrxane viraşt û wesayîtan tîya tamîrr kenê.”

Hemoyî vat: “Gama ke pêkewtişê giranî nêvirazênê ez 10-15 rojan ra reyêk şina şaristanê Rimêlan serdanê keyeyê xo kena.”

Ciwano bi nameyê Nêçîrvan Hesen zî ke vano 7 serrî yo tamîrxane de westa yo û qasê serrêk o ke tamîrxaneyê peyê cepheyê QSDyî de xebetêno. 

Westa Nêçîrvano ke vat o heman wextî de gureyê xo yê eskerîye zî keno qiseykerdişê xo wina domna: “Ma tîya hem eskerîya xo kenê hem zî pîya bi şerwananê xo hemleye de ca gênê. Hemleyan de wesayîtî xeylî muhîm ê, ez eşkena vajî ke baro giran milê înan de yo.”

Çeteyanê DAÎŞî dimayo ke serra 2014 de Mosil bi dest fînabi îdîaya îlankerdişê xîlafetî kerdebî û dimayê girewtişê Reqa ya Sûrîye zî nameyê xo yê Dewleta Îslamî ya Iraq-Şamî vurnabi kerdibi Dewleta Îslamî.

Bi xelesnayîşê şaristenekê Hecînî do çeteyê DAÎŞî yê ke serra 2014 ra nata dorê vakurê royê Firatî îşxal kerdê bi temamî bêrê pakkerdene.