Derheqê hêrişê Hesekê de çîyê ka ganî bizanîyê
Hêrişê hemkarî yê dewleta tirke û DAÎŞî yê vera Hesekê ra dima persê sey ''DAÎŞ agêrayo?, Qelsîya îstîxbaratî estbi?' yenê eqlan. La bi zelalî zanîyeno ke DAÎŞî waşt newe ra herême de serdest bibo.
DAÎŞî 20ê çeleyî de taxa Xiwêranî ya Hesekê de hêrişê Zîndanê Sinaa kerd ke tede 4 hezar û 100 endamê DAÎŞî estê.
Dima ke 2019 de Baxoz de estbîyayîşê erdî yê DAÎŞî amebi çinkerdene 11 hezar cergî hetê QSDyî ra tepişîyabî. 70 hezar cinî û domanê cerganê DAÎŞî de kampanê Rojawanî de tepişîyayêne.
4 hezar û 100 cergê DAÎŞî Zîndanê Sinaa yê taxa Xiwêranî yê Hesekê de tepişîyayêne. 700 domanê ke DAÎŞî sey leşkerî perwerde kerdêne zî heman zîndan de merkezê rehabîlîtasyonî de bîyî.
Îdareyê Xoserî û QSDyî çend reyî venga 54 welatan da ke wa bêrê hemwelatîyanê xo yê DAÎŞî bigêrê. Îdareyê Xoserî wina pêşnîyaz da ke wa seba muhakemekerdişê cergan mehkemeya mîyanneteweyîye bêra ronayene yan zî welatî hemwelatîyanê xo bigêrê û bi xo muhakeme bikerê. La nê welatan cewabêko musbet nêda vengdayîşê Îdareyê Xoserî.
Hêrişê Hesekê yê DAÎŞî ra dima persê sey 'Gelo qelsîya îstîxbarat yan zî asayîşî estbi û nê kêmîyê QSDyî bîyî?' ameyî persayene.
Herême de arêdayîşê îstîxbaratî, analîzkerdiş, vilakerdişê agahîyan û girewtişê tedbîran wezîfeyê endama Koalîsyonê Mîyanneteweyî Fransa yo. Caardişê asayîşê zîndanî wezîfeyê Îngilîstanî bi. Yanî nê hêrişî de yew qelsîya QSDyî çin a. Verî zî QSDyî xîretê remnayîşê cergan pûç kerdbî.
Eke hêrişo peyên ser bikewtêne pêro dinya do binê tehlukeyêkê pîlî de bimendêne. Goreyê selahîyetdaranê QSDyî hedefo esas ê DAÎŞî no bi ke dima ke cerganê Hesekê bixelisno Reqa û Dêra Zorê de hukm bikero.
