Weqfa Cinîyan ê Azadan şaristanê Dêrikî yê Kantonê Qamişloyî de seba cinîyan  xebatê tewir bi tewir kerdî. Nînan ra yew zî xebata perwerdeyê deştişê cilan a. No perwerde 12 cinîyan ra yeno meydan, tîya de cinî mûsayîşê heme metodê deştişê cil û belgan vînenê. Perwerde do 45 rojan dewam bikero. Derheqê babete de cinîyanê ke beşdarê perwerdeyî bîyê ercnayîş kerdî.

Mamoste Semîha Hisêne girîngîya perwerdeyê deştişî ser o vinderte û vat: "Bi hetkarîya Weqfe ma dest pê perwerdeyî kerd. Heta nika ma xeylê babetan de seba cinîyan perwerde da destpêkerdene. Ma wazenê ke cinîyî pêro xebetan bimûsê û cuya xo de averşîyayîşêk awan bikerê. Wa cinî hewceyê çewî nêbê. Cinîyê ke beşdarê perwerde bîyê, kêm bo zî serê deştişî de fikrêk înan esto. Cinîyê ke tîya mûsenê, eşkenê teber de derûdorê xo rê zî ramojnê. Amancê ma oyo ke na babete de cinîyî bibê wayîrê karêkî.”

Nadîya Elîye zî beşdarê perwerdeyê deştişê bîye û wina vat: “Di hewte yo ke ez beşdara perwerde bîya. No perwerde seba ma zaf baş o, nika zî ma eşkenê xo bi xo projeyêkê qijî abikerê û debarê keyeyê xo bikerê. Makîneya mi keye de esta û ez fikrîyena ke cîrananê xo rê zî ramojnî.''