Dewleta Tirkî gorê Şêx Berakatî yo 500 serre rijna

Dewleta Tirkî ya ke Rojawan îşxal kerdo, tarîxê Kurdan zî çinê kena.

Koyê Şêx Berakatî ke bajarê Darize yê rojawanê Helebî de yo cayêko tarîxî yo. Nameyê şêxêkê Êzidîyan ê bi nameyê Şêx Berakatî ke verê 500 serrî herême de bi, ci rê panîyayo.

Koyê Şêx Berakatî hetê împaratorîya Roma ra sey wareyêko stratejîk ameyêne şuxulnayene. Vero ke hetê Osmanîyan ra bêro îşxalkerdene, koyê Şêx Berakatî herêmêka Kurdanê Êzidîyan bîye. Labelê dimayo ke Osmanîyan herême îşxal kerde, hemverê Êzidîyan de hêrişêko pîl virazîya. Nê serranê peyênan de dimayo ke dewleta Tirkî herême îşxal kerde, gorê Şêx Berakatî bi temamî ame rijnayene û heme vermendeyê tarîxîyî ameyî çinkerdene. Dewleta Tirkî wazena, dêso ke seba visnayîşê têkilîya Efrînî virazena, biresno heta na herême.

Şêx Berakat Seba Hemeyê Şaranê Herême Cayêko Muhîm o

Endama Yewîya Êzidîyan Gulê Cafere vat, Şêx Berakat tena seba Êzidîyan nê, heman wextî de seba Musulman, Ermenî û Mesîhîyan zî muhîm o û vat, “Mîyanê împaratorî û dewletanê ke herême îşxal kerda de, aya ke tewr zaf zirar dayo tarîxê ma dewleta Osmanîyan bîye. Amacê înan o sereke çinkerdişê tarîxê Kurdan, Êzidîyan bi. Tena Şêx Berakata de nê, Osmanîyan her ca de tarîxê ma çinê kerd. Nebîhûrî de cayêko ma yo pîroz estbi. Osmanîyan ûca zî camîyêk viraşte û şêxêk ûca bica kerd, bi nê hawayî vatî ke o ca ê înan o.

Şêx Berakat Kurdêko Êzidî yo. Pîya bi ê birayê ê Şêx Elî estbi. Erdê xo, dînê xo pawitêne. Her diyî zî herême de şehîd bîyî. Gama ke dewleta Tirkî Efrîn îşxal kerd nuqtaya xo ya stratejîke ûca awan kerde. Çunke Şêx Berakat serê pêroyîya herême de cayêkê berzî de yo. Heleb, Îdlib, Şehba û Efrînî ra berzêr o. Nika Şehba de cayo ke mat ede yê ma koyê Berakatî vînenê. Cayo ke seba ma pîroz o hetê dewleta Tirkî ra ameyo rijnayene. Dewleta Tirkî şarê ma û tarîxê ma raste ra wedarena. Ma do çi rey nê qebûl nêkerê. Ma do erdê xo û tarîxê xo dewleta Tirkî rê nêverdê.”