Fermandaro Pêroyî yê Hêzanê Sûrîyeya Demokratîke (QSD) Mazlûm Ebdî bi meymanê bernameyê 'Alternatîf Gundem' ê Medya Haber TV ke hetê Bariş Boyrazî ra ame pêşkêşkerdene û behsa rewşa peyêne ya Vakur û Rojakewtena Sûrîye kerde.

'Herêma Ey a Biasayîşî Xeyal o'

Fermandarê Pêroyî yê QSD’yî  ard ziwan ke Serekkomaro Tirk Recep Tayyîp Erdogan Kombîyayîşo Pêroyî yê Neteweyê Yewbîyayeyî de pê qiseykerdişê xo eşkera kerd ke wazeno Vakur û Rojakewtena Sûrîye îşxal biko û wina dewam kerd: "Eşkera yo ke planêko vurnayîş ê nufusî yo, planê îşxalkerdiş o. Ne ma, şarê Sûrîye ne zî hêzê mîyanneteweyî eşkeno nê planî qebul biko. Şarê Vakur û Rojakewtena Sûrîye firsend nêdanê nê planî. Çîyêko xeyalî yo ke kesan bîyarê nê herêman û pê înan bajaran, dewan saz bikê. Qet pratîk de zî çîyêko winasenê nêro kerdene. "

'Herkes Eşkeno Abigêro Keyeyê Xo'

Êyê ke ma qebul kenê: Pêroyê multecîyan, çi Tirkîya de çi zî cayanê bînan de yê. Herkes eşkeno abigêro keyeyê xo. Do paşt zî înan rê bêro dayene. Tîya de teyna şertêk esto: Êyê ke agêrenê eke verba şarî sucêk kerdibi, derheqê înan de do edalet bêro xebitnayene."

'Mekanîzmayê Asayîşî yê Sînorî Xebitîyeno'

Fermandaro Pêroyî yê Hezanê Sûrîyeya Demokratîke Ebdî vat: "Ganî mekanîzma hîrê hebî prosesê ci estbê. Heta nika bêmesele dewam kerd. Bi nameyê QSD'yî ma heta nika berpirsîyarîyê xo ardî ca. Çarçeweya ameye mojnayene de dest pêkerd û dewam keno."

'Şaşîtîya Pîle ya Komîteya Qanûnê Bingeyênî'

Ebdîyî bale ante serê Komîteya  Qanûnê Bingeyênî ya ke hetê Sekretero Peroyî yê Neteweyê Yewbîyayeyî ra ameye  eşkerakerdene: "Xebatêka temsîlkarê şaran ê Vakur û Rojakewtene tewrê ci nêbîyî, mumkîn nîyo ke ser bikewe. Ma zanenê ke tedayanê dewleta Tirkî ra bi nê hewayî bîyo. Paştdayoxê sazkerdiş ê komîteye zî ci ra qebul kerd. Na zî şaşîtîyêka pîl a."

'Eke Temsîlkarê ma Beşdar Nêbê, Ma do Red Bikê'

"Eke temsîlkar û parçeyê na herême tewrê proses ê çareserîye nêbê, ma do netîceyê ke vejîyenê meydan qebul nêkerê. Ma do her netîce ke ci ra bivejîyo red bikê. Coka hirê ra yew para Sûrîye do red bike û no kar bênetîce bimano. Eke  çareserîye yena waştene, şert o ke temsîlkarê na herême beşdar bibê. Şert o ke Qanûnê Bingeyênî yo ke do bêro amadekerdene goreyê waştişê şaran ê na herême bibo."