Endamê HPC-Jinî yê Kongreya-Starî vera tehdîtanê hêrişî yê dewleta Tirkî hêrsê xo ard ziwan û vat ê do her tim herra xo bipawê.

Endama HPC-Jinî ya Qamişlo  Wetha polîtîkaya hêrişkare ya dewleta Tirkî vist vîrî û va: ‘’Erdogan qic, pîr, cinî nêvano şarî qetil keno. Îşxal û talanê Efrînî qîm nêkeno? Xo ra tarîxê şima bi qetlîaman yeno zanayene. Enwer  Paşa, Sûltan Paşa; şima heme qetlîman û gonî ra xo weye kenê. Hinî qetilkerdişê şaran rê beso! Bi qetlîaman şima waşt ke  Ermenîyan, Kurdan û Êzidîyan biqedînê. Ma herra xo de û semedê pawitişê herra xo heta çilka peyêne ya gonîya xo xover danê. Ma sey cinîyan ê HPC-Jinî semedê pawitişê kuçeyan, dewan û bajaranê xo her tim amade yê. Ma heta ke destê ma ra bêro haştîye wazenê la eke hêrişêk bibo ma xoverdayîş rê amade yê. Ma sey cinîyan nêwazenê kesêk bimiro. Ne Tirk, ne Kurd ma nêwazenê kesêk zirar vîno.

‘Ciwîyayîş Xoverdayîş o’

Erdogan vano ke ez vera heme Kurdan a û înan rê zulim keno.  Rayber Apo vano, ‘Heme dinya zî bêro têhet ez hêrişê herra kesêk nêkena, îşxal nêkena la eke ma rê hêriş bibi ma xover danê xo pawenê.’ Seke Fermandaro gird Mazlûm Doganî vat, ‘ciwîyayîş xoverdayîş o’ û ma do sey şarî xover bidê. Ma tîya ra veng kenê heme dinya wa vera nê hêrişî bêveng memanê. Temsîlkarê heqanê merdiman, sazîyê cimatî yê sivîlî ça de yê? Erdogan ganî Lehey de bero muhakemekerdene. Cinîyanê ma qetil kenê û bedenê înan  teşhîr kenê. La ma cinîyê Kurdî zanê ke namûsê ma herra ma welatê ma şehît û şerwanê ma  yê. Ma do her tim kişta înan de bê. Ma ewro haştîye rê zî şer rê zî amade yê. Ma do heta çilka peyêna ya gonîya xo xover bidê û şer bikerê. Semedê pawitişê qican û pîranê xo ma xoverdayîş rê dewam bikerê.’’

‘Ma do Verê Erdoganî de Milê Xo Çewt Mekerê’

Endama sazîya Keyeyanê Şehîdan û HPC-Jinî Galya Sulemane zî vat: ‘’Ma Erdoganî herra Sûrîye de nêwazenê. Ma Rayber û şehîdanê xo ser sond wend ke ma do nê fikîrî çirey canêverdê. Erdogan semedê na herre ne laj ne zî kênaya xo feda kerde. Şarê Sûrîye û Tirkîya qetil keno. Heme dinya ey rê çimanê xo bigêrê zî Kurdî do verê ey de milê xo çewt mekerê. Ma ey ra nêtersenê, ma soz dayo ke ma do rayîrê Rayberîye de heta mergî rayra şirê.’’

‘Ganî Ma Bi Hêzê Xo Yê Xoserî Xo Bipawê’

Endama HPC-Jinî ya Amûde Perwîn Sînane zî hêrişê Erdoganî şemeraz kerdî û va: ‘’Ma sey HPC-Jinî nê hêrişanê vera xo qebûl nêkene. Heta ke ma dest ra bêro ma do xover bidê. Ma nêwazenê ke teber ra hêzêk bêro ma bipawo. Ma sey HPC-Jinî amadeyê ke heme berpisîyarîya xo bica bîyarê. Semedê welatêkê azadî, Kurdistanêkê azadî û merîmîya azade ganî ma bi hêzê xo yê xoserî xo bipawê.’’