Hêrişê artêşa tirke ya îşxalkere yê vera Eyn Îsayî bi zêdîyayîşî dewam kenê. Hema hema her rojê serê sîvîlan de bombayî yenê varnayene. Menga tebaxe ra nata 9 kesî ameyî qetilkerdene û xeylêk kesî birîndar bîyî.

Dewijanê dewa Hîşê ya Kantonê Girê Sipîyî yo ke Eyn Îsa zî tede yo, vera hêrişanê dewlata tirke hersê xo ard ziwan.

Emîne Osman bale ante ser ke dewleta tirke wazena ke herêma veng bikero û vat: ''Dewleta tirke seba ke ma erdê ma ra vejo çîyo ke destê ci ra yeno kena. Dewleta tirke her roje hêriş kena, sîvîlan qetil kena. Domanan qetil kena, extîyaran remnena. Wayîrê na herre ma yê, cayê dewleta tirke tîya çîn o. Dewleta tirke erdê ma îşxal kena û çeteyan tede ca kena. Vera naye Rûsya ke qaçîko garantor a, bêveng  a. Rêna Rûsya nê welatê mîyanneteweyî nê hêrişan têna seyr kenê. Hende sîvîlî yenê qetilkerdene. Xeymê înan de nîyo. Ma Girê Sipî ra vetî û tirkî tede ca kerdî. Nika eynî çî Rûsya zî wazena. Ma ewro xeyrê domananê xo keyeyanê xo de eşkenê bimanê. Domanê ma cepheyan de ma pawenê. Ê vera tank û topanê dewleta tirke ma pawenê, ma zî tim wayîrê înan vejîyenê.''

Hemserekê Meclîsê Hişê Xelîl El Îsayî zî ard ziwan ke vera hêrişanê dewleta tirke û çeteyanê ci  şarê herême bi yewbîyayîşî vejîyeno û vat: ''Demo pêyen de hêrişê dewleta tirke zêdîyayî. Nê hêrişan de sîvîlî yenê qetilkerdene û keyey û dewê înan yenê talankerdene.  Nê hêrişî verê çimanê dinya de yenê kerdene. Ma sey şarê Rojawanî ganî bibê yew vera nê hêzanê radîkalan şer bikerê û înan erdê xo ra vejê. Ma binê serbanê QSD  û Îdareyê Xoserî de  mîyanê asayîşî de ciwîyene. La dewleta tirke seba ke kaos vejo heme metodan ceribnena. Dewleta tirke wazenê herême veng bikero û dewanê ma xo rê bikerê baregeh û çeteyan û keyeyanê înan tede ca bikero.''

Dewijê bînî Xelef Gedroyî zî vera hêrişanê dewleta tirke hersê xo ard ziwan û vat: ''Dewleta tirke heme şarê herême hedef kena.  Wazena şaran yewbînan ra raqilno. Dewanê Safawiyê û Dibisî de qikerdişî kerdî. Vera ma heme qeyde tifingan şuxulnena. Wazena ma erdê ma ra vejo.  Girê Sipî de zî  şarî rê zulm yeno kerdene. Şar nêefteno keyeyanê xo ra vejîyo. Merdimî semedê fîdye yenê remanyene û qetilkerdene .''