Şerê mabênê Hamas-Îsraîlî, şerê Îsraîl-Lubnanî, hêrşê Îranî, pêkewtişê Sûrîye û hêrişê dewleta tirke ya îşxalkere Rojhelatê Mîyanênî de bi giranî dewam kenê. Endama Dîwanê Hemserekîye yê PYDyî Foza Yûsif derheqê babete de qisey kerd.

Foza Yûsif da zanayene ke hegemon û îqtîdarî merkezê şerê dinya sey herêma Rojhelatê Mîyanênî weçînenê goreyê menfaetanê xo têgêrenê û vat: ''Rojhelatê Mîyanênî de çar parçeyanê Kurdîstanî de şerêko pîl qewimîyeno. Sûrîye û Rojawan de qasê 14 serrî yo şerêko pîl qewimîyeno. Heyf ke nika ma nêeşkenê qalê çareserîye bikerê. Hêrişê Îsraîlî yê vera Îran3i zî tesîrê Sûrîye kenê. Sûrîye sînorê Tirkîya û Iraq de yê. Dewleta tirke sîyasetê xo hertim şer û alozîyan de şuxilnena. Ganî sey têgêrayîş û şarî ma xo seba şerê giranî amade bikerê.  Tay hêzê dewletê hegemonîkî û kolonyalîstî amadekarîyanê hêzanê pawitişî yê Rojawanî kenê babeta nîqaşî. Eke ma wazenê haştîyêka mende bîyara ca ganî ma xo seba şerî amade bikerê. Coka ganî ma pawitişê xo xurtêr bikerê.

Sey hêzanê asayîşî û pawitişî yê QSD, YPJ û HPCyî ma vera hêrişêkê muxtemelî yê îşxalê dewleta tirke ma amadekarîya xo kenê. Şarê ma ganî paştî bido domananê xo yê cepheyê şerî. Ganî pêro şarê Rojawanî pawitişê xo bîyaro ca. Kaosî ra tek rayîrê xelisîyayîşî; rêxistinî û amadekarîya seba şerê şarî yê şorişgêrî yo. Ganî ma pawitişê xo xurtêr bikerê.''

Îsraîl keno ke şerê xo yê vera Hîzbullahî derbazê Sûrîye bikero. Îran zî Sûrîye de hêzanê xo yê çekdaran zêdîneno ke alozîye xorinêr bikero.Nê mabênî de dewleta tirke Rojawanî tehdît kena û gêrena firsendê hêrişanê neweyan. Xora Girê Sipî, Serêkanîyê û Efrîn binê îşxalî de yê. Îdareyo Xoser hertim seba haştîye û dîyalogan amade yo. La hukmatê Şamî cewab nêdano gefan. Ma ancî tîya ra veng danê ke şarê herême wa bibê yew û vera hêrişanê muxtemelan xo ver bidê.''