Wexto ke kokê Şorişê Rojawanî erzîyayêne Sosine Amed Şam de bi. Wextê Şorişê Rojawanî de zî keyeyê ci agêra Rojawanî, Dêrik. Keyeyê Sosine o çax hêrişan ra wazeno koçê Başûrê Kurdîstanî bikero. Sosine nêwazena şora Başûrî la nêeşka keyeyê xo zî îqna bikera. Raywanîya ver bi Başûrî de Sosine yew qayde keyeyê xo kanî kena û agêrena tewra YPJyî bena.

Sosine hînî bena şerwana YPJyî û tewra Hemleya Çilaxa û Til Hemisî bena. Sosine wina qala ê rojan kena: ''Hemleya Til Temîrî dest pêkerdbî. Her roje şer est bi, cergî kişîyayêne û şar ameyêne xelisnayene. Dişmenî rayêke waşt hêrişê girê Rûgoba û Til Nasirî bikero. Şer qewimîya. Hûmara ma kêm bîye û ganî ma xo biresnayêne gir. Wextêkê kilmî de dişmenî pêro rayîrî girewtî binê kontrolî. La ganî ma ser bikewtêne û embazê xo ablûqa ra bivetêne. Dima ma rayîrêk dî û Girê Rûgoba de xo resna embazan.

Şer dewam kerd, dişmen neçare mend ke xo apey bianco. Dişmen gir pê tank û topan da bombayan ver. Hewa zaf serd bi. Teyna yew lapikê mi est bi û mi oy bînî vînî kerdbî. Mi zanayêne ke do çîyêk biqewimîyo. Wextêk ra dima ez pê vengê hawanan werişta we. Mi dî ke baska mi dejena. Wexto ke ez ewnîya baska xo, mi dî ke çermêko tenik şîyeno tê. Mi fam kerd ke baska mi do bêra pakerdene. Mi ra zaf gonî şîbî. Mi xo bi xo vat ke ez do senî bieşka şer bikera. La ganî mi xo ver bidayêne. Mi zo pîzeyî de vat 'Sosine se beno wa bibo ti zixm be û fek vera mede.' Mi xo ver da. Nêbîyayêne ke ez teslîma dişmenî biba. ''