Siwar Rojdem Şorişê Rojawanî reyde Til Temir de şerwanan û fikranê Rayberê Şarê Kurdî Abdullah Ocalanî şinasneno. Şehadetê birayê xo û xalzayê xo ra dima Siwar zî verê xo dano cepheyê şerî. 

Siwar hêverî dewa Xeybîşî de wezîfe keno ke birayê ci tede şehîd bibi. O çax tay dewê Til Temirî hema zî destê DAÎŞî de bîyê û Kobanê de Hemleya Şehîd Gelhatî, Cizîre de zî Hemleya Şehîd Rûbar Qamişloyî dîyabî destpêkerdene.

Siwar Hemleya Şehîd Rûbar Qamişloyî de cagêno. Siwar wina qala ê rojan keno: ''Ma roje de 2-3 dewî azad kerdêne. Ma zaf şehîdî zî dayêne. Mi xeyalê xo kerdbi raşt û ez bîya berpirsîyarê doçka. Şehîd Rojdem zî berpirsîyarê doçka bi. Embazan doçkaya ey dabî mi. 

Ez û embaz Ednan ma dewa Til Hemamî de bîye. Ê germê hamnanî de ma versîya keyeyêkî de binê dêsî de roniştêne. Kişta ma de zî doçkaya ma est bîye. A roje tay embazî zî ameybî û ma xendekî viraştêne. O çax tay kesî serê motorsîklete de ver bi ma ameyêne. Ma înan ra persayî ke çira ameyê. Înan zî vat ke cergan hêrişê keyeyê înan kerdo coka seba eşyayanê xo ameyê. Seba ke DAÎŞî xeylêk cayan de mayînî nabî ro, ma şar hişyar kerdêne. Dima motorsîkletêka bîne ameye. La narey şikêk kewt zerrîya mi. Seba ke eşyayanê înan bidê ma kewtî keyeyê înan. Ma di berî akerdî. La zerrîya mi rehet nêbî. Dima Ednenî bero bîn akerd. O çax ez pê tesîrê teqayîşî perraya dêsî ser. Embaz Ednan zî uca de şehîd bîyo.

Ez mîyanê tozî de menda, werişta we la birîndar bîya. Ez teqayîşî ra tewş bîya. Dima mi lingê xo eşt mayînêko bîn teqa. Wexto ke ez hesîya xo 26 rojî şîbî. Mi çimê xo akerdî, bedanîye xo ser ra kerde. Mi dî ke di lingê mi zanîyan ra qerifîyayê. Mi bawer nêkerd. Mi bedanîye vera akerde, ante ser... Wextêk mi teyna wina kerd.

Mi reyna çimê xo qefilnayî. Awil mi xo bi xo pers kerd ke ez senî do biciwîya. Keyeyê mi û embazanê fikrê mi fam kerd. Rojêke di embazê ke lingê ci zanîyan ra çin bîyê, ameyî mi hetî. O çax her çî vurîya. Mi dî ke nê embazî hema zî bi zixmî perwerê cuye û têkoşînî yê. Ma sey hîrê şehîdanê gandaran destî dayî destî û nêweşxane ra vejîyayî.''