Sekreterê Pêroyî yê Partîya Çepe ya Demokratîke ya Rojawanî Salîh Gedoyî ard ziwan ke hêrişê vera PKKyî estbîyayîşê heme kurdan çîn keno û vat ganî hukmatê Hewlêr û Silêmanî Başûr de destûrê MÎTî medo.
Sekreterê Pêroyî yê Partîya Çepe ya Demokratîke ya Rojawanî Salîh Gedoyî derheqê Zînî Wertê û mesajê yewîye yê Rayberê Şarê Kurdî Abdullah Ocalanî de ANFyî rê qisey kerd.
Gedoyî vist vîrî ke kurdî û şarê Kurdîstanî tarîxî ra raştê qirkerdişanê Tirkîye yenê û vat: ''Kurdan seserra 21. de destkewteyê girdî fînayî dest. Vakur de 4 serrî verî HDP pê 80 wekîlan kewt meclîs û se ra zafêr îdareyê cayîyî fînayî dest. Başûr de rayberîyê kurdan de hukmatêk esto. Rojawan de rayberîya kurdan Îdereyo Xoser o Demokratîk ro nîya û 5 serrî yo xabatan rayra beno. Hêzanaê YPG û YPJyî bi dayîşê 10 hezar şehîdan serkewtişê girdî fînayî dest û peynîya DAÎŞî ard. MSD ronîya û ewro binê serbanê QSDyî de 100 hezar şervanî cepheyan de şar û destkewteyanê xo pawenê. Nê destkewteyan têna şarê kurdî nê heme şarê Kurdîstanî şa kerdî. Ganî nika partîye sîyasîyî û rêxistinê kurdan semedê pawitişê destkewteyanê xo wezîfeyê xo yê neteweyî bîyarê ca.''
Ganî Paştî bidîyo şorişê Vakurî
Gedoyî wina dewam kerd: Teyarayanê şerî yê dewleta tirke hêrişê Mexmûr û herêmanê bînan ê Başûrî kerd û sivîlî şehîd kewtî. Semedê kurdan no rewşêka zaf xirab a. Şarê kurdî semedê na babete qerqilîyeno. Wexto ke mîyanê kurdan çîyê winayênî qewimîyenê moralê şarê ma zî xeripyeno. Seke yeno zanayene şar yewîya neteweyîye wazeno. Şarê kurdî sey vizêrî ewro zî yewbîyayîşê kurdan wazeno. Wexto ke Nemîr Barzanî Başûr de 1860î de dest pê şorişê êlule kerd Rojawa, Vakur û Rojhelatî paştî daye ci. Wexto ke Rayberê PKKyî 1984 de Vakur de têkoşînê gerîlayan da destpêkerdene reyna heme kurdan paştî daye ci. Ewro Vakur de şorişêk esto. Ganî partîyê kurdan paştî bidê yewbînan. Herinda rayîrê yewbînan birnayîşî de wa rayîrê dişmenî bibirnê. Ganî paştî bidîyo şorişê Vakurî. Hukmatê tirkî, AKP û Erdogan ê ke dişmenê kurdan ê wazenê nê şorişî bifatisnê. Kurdan verdênê yewbînan ke şorişî bişiknê.
Wa Başûr de vernîya MÎTî bêro girewtene
Sahîh Gedoyî derheqê Zînî Wertê de nê vatî: ''Ganî hêzê kurdan, gerîla û peşmergeyî cayê yewbînan mekewê. Wa bikewê cayê dişmenî. No xizmetê kurdan nê dişmenî rê xizmet keno. No wezîfeyê têgêrayîşan o. Bitaybetî 3 hêzê pîlî (PKK, PDK û YNK) nê wezîfeyî biruh bigêrê xo ser. MÎT Başûr de ameyo cakerdene. No verî semedê Başûrî ezîyet o. Ganî PDK û YNK destûr medê MÎT ûca xo rêxistin bikero û vernîya ci bîgêrê. MÎT qey yeno Başûr? Seba ke kurdan biverdê yewbînan, mabênê înan abikero û destkewteyanê înan çîn bikero. Astengkerdişê naye wezîfeyê partîyanê sîyasîyan ê Başûrî yo. Bitaybetî hukmatê Hewlêr û Silemanî ganî vernîyê ci bîgêrê. Ê Başûr îdare kenê ganî tirkan ra vajê hînî bes o. Kurdî ganî vera MÎTî hîşyar bê û destûrê kayanê înan medê.''
Rayber Apo tim semedê yewîya neteweyîye xebitya
Gedoyî derheqê vengdayîşê yewîya neteweyîye yê Ocalanî ya peyêne de zî nê vatî: ''Qiseykerdişê telefonî yê Rayber Apoyî şarê ma ser o tesîro gird kerd. Qiseykerdişo kilm de semedê heme partîyanê sîyasîyan ê kurdan mesaj ame dayene. Rayber Apo tim semedê yewbîyayîşê kurdan têgêreno. Mi Rayber Apo raya verêne 1981 de dî. Rayberîye o wext zî yewîya neteweyîye ser o vindertêne û vatêne serkwtişê kurdan bi yewbîyayîş mumkun o.''
Şerê vera PKKyî şerê vera heme kurdan o
Gedoyî ard ziwan ke dewleta tirke têna vera PKKyî nê vera kurdan şer kena û vat: ''Înan hela ke hêrişê Rojawan, Efrin, Serêkanîyê û Girê Sipî kerd vatêne ma hê vera PKKyî şer kenê. La na zûr a, hêrişê heme kurdan kenê. PKK koyan de yo, beyraqa PKKyî koyan de têşîyena û heme şarê kurdî zî naye zanê. Şerê vera PKKyî yeno manaya şerê vera heme kurdan. Ganî heme partîyê sîyasîyî yê kurdan na raştîye bizanê ke eke PKK biqedîyo PDK û YNK zî qedîyenê. Heme destkewteyî çîn benê.''
Ma paştî danê dîyalogî
Gedo yo ard ziwan ke ê paştî danî dîyalogê mabenê PYD û ENKSyî û vat: ''Ma semedê yewbîya neweteweyîye ya kurdan paştî danê. Ma wazenê ke kurdî pê şer nê pê dîyalogî problemanê xo çareser bikerê. Eke gerîla û peşmergê bêrê vera yewbînan no semedê şarê ma xirab beno. Kurdan 2013 de semede yewîye amadakarîya kongre kerd la dişmenanê kurdan mudaxale kerd. Ewro zî hewceyê kongreya neteweyîye esto. Ganî hemê hêzê kurdan kongre de bêrê têhet û waştişê dişmenanê kurdan pûç vejê. Dişmenê ma wehşî yo têna bi yewbîyayîş ma eşkenê vera înan ser bikewê.''
