Kurdan û şaranê bînan ê Rojawanî 19ê temmuza 2012î de bi Şorişê Rojawanî, projeyê Neteweya Demokratîke newe ra rêxistin kerd. Herêma Cizîre de 20ê çeleyê 2014î de, Kobanê de 27ê çeleyî de û Efrîn de 29ê çeleyî de kontonê Îdareyê Xoserî ame îlankerdene. Dima zî herêmê ke destê DAÎŞî ra ameyî xelisnayene 6ê êlula 2018î de îdareyanê Cizîr, Firat û Efrînî reyde, bi beşdarîya Reqa, Tebqa, Minbic û Dêra Zorê zî Îdareyo Xoser ame îlankerdene.

Wayîrê fikrê modelê Îdareyê Xoserî Rayberê Şarê Kurdî Abdullah Ocalanî yo. No modelê îdareyî hetê temsîlkaranê kurd, ereb, sûryanî, armenî, çerkez û tirkmenan ra yeno caardene. Sîstemê Îdareyê Xoserî reyde çarçewa projeyê hemserekîye de herême de cinîyî zî mîyanê îdareyî de cagênê.

Îdareyo Xoser ê Rojawanî yo ke tede xeylêk komîteyî est ê, welatanê Swîsre, Belçîka, Almanya, Fransa û Başûrê Kurdîstanî de zî ofîsê ci yê temsîlkarîye est ê. Parlamentoyê Başûrê Kurdîstanî 2014 de, Katalonya 2021 de Îdareyo Xoser şinasna. A raşte pratîk de Îdareyo Xoser hetê dewletan ra şinasîyeno la bi hawayêkê fermîyî nêno şinasnayene. No zî cesarer dano hêrişanê dewleta tirke ya îşxalkere.

Warê Şorişê Rojawanî û Îdareyê Xoserî tim benê hedefê hêrişanê îşxalî yê Tirkîya. Dewleta tirke seba ke kurdan bêstatu verdê, xîret kena ke Şorişê Rojawanî bifatisna, û hêzê mîyanneteweyî yê ke modelê Rojawanî ra zî aciz ê, verê hêrişanê dewleta tirke de 'feraset' mojnenê.