Dewleta tirke serê Kobanê, Minbic û Til Rifatî ra vera Rojawnaî tehdîtanê îşxalî rê dewam kena. Vervatoxanê YPG û YPJyî ard ziwan ke vera hêrişê îşxalî amadekarîye kenê û pêro pîya do verê îşxalkeran bîgêrê.

Vervatoxa Yewîyanê Pawitişê Cinîyan (YPJ) Rûksene Mihemed û Vervatoxê Yewîyanê Pawitişê Şarî (YPG) Nurî Mehmudî derheqê hêrişê Tirkîya û amadekarîya xo de persê ANFyî cewab kerdî.

Tehdîtê îşxalî yê vera Rojawanî kamyew merhele de yê?

Vervatoxa YPJyî Rûksene Mihemed: Yeno vatene ke 'tim tehdîtî est ê' la no qîm nêkeno.  Eşkera şerêk qewimîyeno. Têna tehdît nîyo. Dewleta tirke heta nika hema hêrişê xo yê vera Rojawanî nêvindarnayî. Bi metodanê cîya cîyayan hêrişî yenê kerdene. Ge-ge bi xo hêriş kenê û ge-ge zî bi destê çeteyan hêriş kenê. Raşta nika erdî ra operasonêk çîn o la  hêrişî tim est ê. Dewleta tirke seba ke îqtîdarê xo bido domnayene sîyasetê gonînî rayra bena. Kena ke bi şerî vîjnayîşo ke bîyo nêzdî de ser bikewo.

Vervatoxê YPGyî Nurî Mehmud: Rejîmê AKP-MHPyî tim Rojwanî semedê îşxalî tehdît keno. Keno ke bi destê çeteyan xeyalanê xo bîyaro ca. Tehdîtê dewleta tirke tim est ê la bi tehdîtê 1ê hezîrene yê îşxalê Rojawan û Başûrê Kurdîstanî wazena ke têkoşînê nasnameyê kurdan, demokrasî û azadîye biqedîno, yewîya şaran werte ra wedaro. Erdogan seba ke binkewtişê xo yê Rojhelatê Mîyanênî û dinya û krîzanê Tirkîya binimno, tehdît keno. Bê şerî yewna çareyê rejîmê faşîstî çîn o. Têna Kobanê hedef nîyo. Heme Rojawan hedef de yo. Erdogan wazeno ke kesê ke bawerîya înan azadîye rê est a, rîyê erdî ra biestero. Rojane 24 saete Rojawan ser o teyarayî gêrenê. Reyna pê topanê înan domanî, sîvîlî yenê hedefgirewtene.

Dewleta tirke hema hema her roje hêrişê herême kena. Nê hêrişan de senî ke yeno vatene hedefî 'asayîşê sînorî' yo?

Vervatoxa YPJyî Rûksene Mihemed: Pê nê hêrişan şero taybet yeno rayraberdene  ke yewîya û pîyayîya şaran a ke bi projeyê Netewa Demokratîke ameye caardene, werte ra bêro wedaritene. Nê hêrişan de sîyasetê şerî est o. Pê droneyanê çekdaran fermandarê serkêşî yenê hedefgirewtene ke vera çeteyanê DAÎŞî şer kerdo. Sîstemo xoser yeno hedef girewtine ke heme dinya de bîyo nimûne. Zîhnîyetê îqtîdarî  xora tewr zaf zî cinîyan hedef keno ke Rojawan de serkêşîya şorişî kerde. Têna Rojawan de zî nê her ca de nê cinîyî hedef de yê. Hedefgirewtişê embaze Evîne Goyî zî mojneno ke êyê ke semedê mezgê komelî û komelê azadî tekoşîn kenê yenê hedefgiewtene. Sey cinî û komelî bê têkoşînî yewna rayîrê ma çîn o.

Vervatoxê YPGyî Nurî Mehmud: Sûrîye de nika 3 projeyî est ê. Projeyo yewin awanîya demokratîke ya yewîya şaran. Ê dîyin îqtîdarê Şamî ke wazeno Rûsya û Îranî payra tepişo. Ê hîrin yewîya Erdogan û çeteyan. Projeyê Rojawanî wazeno sîstemêk awan bikero ke şarî xo tede azad îfade bikerê. Wird projeyê bînî wazenê goreyê menfetanê xo şerî xorî bikerê. Şorişê Rojawanî bi yew proje û bale dinya ante. Çunke dinya tehlukeyê DAÎŞî ra xelisna û semedê Sûrîye projeyêko newe aferna. Bi hedefgirewtişê YPG, YPJ û QSDyî eslê xo de  yeno waştene ke yewîya neteweyan, têkoşînê îrade, demokrasî û azadîye bêro çînkerdene.

Eke hêriş bibo şima do senî vera ci vinderê? Amadekarîya şima kamyew merhele de ya?

Vervatoxa YPJyî Rûksene Mihemed: Ma bi xo şer nêwazenê la eke vera estbîyayîş û destkewteyanê şarê ma hêriş bêro kerdene, ma do şarê xo bipawê. Ma sey YPJyî amadekarîye xo kenê.  Hem vera DAÎŞÎ hem zî şerê Efrîn, Serêkanîyê û Girê Sipî de cinîyan serkêşîye kerde. Coka ma ewro wayîrê tecrubeyî yê û şerî rê amade yê. Ma do destkewteyanê Rojawanî bipawê û ruhê yewîya Kurdîstanî xurt bikerê. Wîna ma eşkenê hêrişan bişikinê. Bê têkoşîn û serkewtişî yewna rayîrê ma çîn o. Ma pê hêzê xo û şarê bawer ê, hêzêkê bînî ra pawitişê ma çîn o. Ma do reyna herra xo ra mevejîyê.

Vervatoxê YPGyî Nurî Mehmud: Rojawan de hêzo ke tewr zaf têkoşîn keno şar o. Ewladê nê şarî na herre pawenê. Şar xover dano. Taybet de zî  QSD, YPG û YPJ yê ke çarçeweya pawitişê meşrûyî de ameyî ronayene û hêzê bînî ke mîyanê ci de her hetî ra tedbîrê xo girewtî. Senî ke Til Koçer, Til Zîro, Serêkaniyê ûŞexmeqsud de şerê şarê şorişgêrî ser kewt, vera nê hêrişan zî ma do ser bikewê. Badê serkewtişê Kobanê  hêzê mîyanneteweyî ameyî herême û senî ke hinî hewceyê şerî çîn o ame  mojnayene. La dima ra ame ferqkerdene hêzê mîyanneteweyî menfeatnê dewleta tirke pawenê. Naye ser o şarî semedê şerê şarê şorişgêrî kerd xo çeng û do ewro ra tepîya zî hêzê leşkerî û şarê herême pîya erdê xo bipawê.