Wezîra Edaletî Belloubete radyoyê RMC’yî rê qisey kerd û babeta fikrê mehkemeya mîyanneteweyîye de vat, “Xeylî hemkarê mi, Wezîrê Karanê Teberî û Edaletî ra no fikir Ewropa de yeno parekerdene.”

Wezîre da zanayene, nê munaqeşeyî mabênê gruba “Vendome" de yenê kerdene. Mabênê grube de bi taybetî Wezîrê Edaletî yê Fransa, Almanya, Îspanya û Îtalya estê.

Wezîra Edaletî dubarê kerd ke fikrê mehkemeyêka taybetî ya seba muhakemekerdişê çetyanê DAÎŞ’î hîna “ferezîyêk o” û ard ziwan, mehkeme herême de do bêra awankerdene la beno ke Sûrîya de ney, Iraqî de bêra awankerdene.

Wezîra Fransa ard ziwan ke, teba ney xeylî zehmetî estê û vat, “Ganî dewleta Iraqî tesdîq bikera, hetê bînî ra sere de qedexekerdişê cezaya îdamî ganî şert û mercî bêrê afernayene.”

Wezîra Fransa da zanayene, awankerdişê mehkemeyanê bi nê hawayî wextêko derg wazenê.

Paytextê Swêdî Stockholm de roja Dişemeyî de bi nê amancî kombîyayîşêk amebi viraştene. Swêd û 11 welatê Yewîya Ewropa tewrê kombîyayîşî bîbî.