Vervatoxa Meclîsê Cinîyan ê Amedî yê DEM Partî Gulîze Kaya derheqê qirkerdişanê vera cinîyan de ajansê ma rê qisey kerd.

Gulîze Kaya pare kerd ke Tirkîya de binê qirkerdişanê cinîyan de polîtîkayê îqtîdarê AKP-MHPyî est ê û vat: ‘’2011 de nameyê Wezîrîya Cinîyan sey Wezîrîya Polîtîkayanê Komelkîyan û Keyeyî ame vurnayene, dima Tirkîya Peymana Îstanbulî betal kerde û qanûnê 6284î betal kerd. Erdoganî 2025 sey serra keyeyî îlan kerde. La ma vanê ke 2025 do bibo serra têkoşînî. 

AKPyî îqtîdarîya xo ra nata qirkerdişê cinîyan keno. Sey têgêrayîşî ma destpêkî ra nata azadîya cinîyan pawenê. Azadîya cinîyan esasê têgêrayîşê ma yo. AKP keno ke cinîyan keye de hepîs bikero.’’

Gulîze da zanayene ke polîtîkaya cezanêkerdişî ra qirkerdişê cinîyan zêdîyayê û vat: ‘’Ferasetê serdestîya camêrdan de famkerdişê ‘Ez se bikera zî do ceza nêgêra’ est o.  Heta ke polîtîkayê bêcezaverdayîşî dewam bikerê qirkerdişê cinîyan zî do dewam bikero. Ganî cinîyî bi qanûnan bipawîyê. Ganî polîtîkaya bêcezaverdayîşî biqeda û camêrdê sûcdarî bêrê cezakerdene.’’

Gulîze îfade kerd ke cinîyî ganî xo rêxistin bikerê û vat: ‘’Birêz Ocalanî 27ê sibate de Vengdayîşê Haştîye û Komelê Demokratîkî kerd. Komelo demokratîk yeno manaya xopawitişî. Ma do pawitişê xo bi rayîrê meclîsanê xo bikerê. Ma do her şaristan û qezayanê xo de meclîsanê cinîyan awan bikerê, bi rêxistinîya xo hêzê xo biafernê, têkoşîn bikerê. Cinîyê ke raştê şîdetî yenê wa nêtersê û bêveng nêmanê; ma hetê înan de yê.’’