Vîrusê Korona yo ke tesîrê pêro dinya kerd heta nika herêmanê Rojawan de nêame dîyene. Labelê eke vîrus herême de vila bibo beno ke felaketêk biqewimo.

Herêmê Rojawanî yê ke 7 herêman ra yenê meydan û nufusê ci nêzdîyê 5 mîlyon o,îmkanê ci yê qîmî yê vera Korona çin ê. Sere de Kantonê Hesekê yê herêma Cizîre de herême de bi se hezaran multecîyî estê. Herêmanê Îdareyê Xoserî de bi desam kampê qijkekî û 15 kampê pîlî estê. Bi giranî keyeyê DAÎŞijan, bi des hezaran cinîyî û domanî 2 kampan de manenê. Dezgehê weşîye û hetkarîya merdimîye yê dinya zî hetkarîya kampan nêkenê. Tewr zaf Kantonê Hesekê de multecîyî estê. Nufusê Kantonê Hesekê nêzdîyê mîlyonêk û 413 hezar o. Înan ra 300 hezar kesî îşxalê dewleta tirke de neçare mendî ke Girê Sipî, Serêkanîyê, dewanê Til Temirî û Zîrganî ra koçê Hesekê bikerê.

Kantonê Hesekê de 3 kampê pîlî yê koçberan estê.

Kampa Holî: Kampa tewr pîlêre ya Herêmanê Îdareyê Xoserî ya ke tede 67 hezar û 554 kesî manenê. 10 hezar û 28ê înan cinî û domanê DAÎŞijan ê.

Kampa Waşokanî: Dima ke dewleta tirke şaristanê Serêkanîyê û Girê Sipî îşxal kerdî kampe ameye awankerdene. Tede 9 hezar û 700 roniştoxê Serêkanîyê, dewanê ci, Til Temîrî û Zîrganî manenê.

Kampa Arîşe: Tede zafêrî kesê ke herêmanê rejîmê Sûrîye ra bi taybetî Dêra Zorê ra koç kerd manenê. Nufusê ci 13 hezar û 445 kesî yo.

Awa Hesekê ya ke bi giranî herêma Elûkî ya Serêkanîyê ra yena hetê dewleta tirke ra 4 reyî ameye birnayene. Wextêk de ke dinya vera vîrusê Korona xo ver dana dewleta tirke 21ê adare de awa Kantonê Hesekê, Til Temirî û merkezê şaristanan newe ra birnaye. Şêwirmendê Kampanê Herêma Cizîrî yê Ofîsê Kampan û Multecîyan ê Îdareyê Xoserî Rojhat Elîyî ard ziwan ke birnayîşê awe tewr zaf tesîrê Kampa Waşokanî û merkezê şaristanî keno. Elîyî vat: ''Îmkanê ma tay ê.Ma nika bi tankeran awe benê Hol, Arîşa û Waşokanî. Eke vîrusê Korona peyda bibo felaketêk do biqewimo. Dewleta tirke bi nê hawayî cuya merdiman rê gef wanena.''

Herêma Qamişloyî de di kampî estê:

Kampa Newroze: Tebaxa 2014î de seba êzidîyanê ke Qirkerdişê Şengalî ra remayî û Rojawan de ca da xo ameye awankerdene. Dima ke Şengal DAÎŞî ra ame xelisnayene êzidîyî agêrayî.Roniştoxanê Girê Sipî, Serêkanîyê û Til Temirî ra 379 kesî tede manenê.

Kampa Roje: 1833 (521 keyeyî) tede manenê.

Kampa Til Semînî: Kampa Til Semînî ya Herêma Reqa de Girê Sipî, Eyn Îsa û Kobanê ra 2 hezar û 288 kesî manenê. Na kampe destpêkerdişê îşxalê dewleta tirke yê 9ê teşrîna verêne ra dima ameye awankerdene.

Kampa Mehmûdî: Na kampa herêma Tebqa de 8 hezar û 176 kesî manenê ke erdê rejîmê Sûrîye ra koç kerd.

Minbic de 3 kampê koçberan estê.

Kampa Minbicî ya rojhelate ya verêne: Tede 2 hezar û 442 kesî manenê.

Kampa Minbice ya rojhelate ya newîye: Tede 2 hezar û 912 kesî manenê.

Kampa Cedîdet El Hûmirî: Tede 300 roniştoxê îdlîbijî estê.

Herêma Şehba de 100 hezar şehbayîjî û 100 hezar efrînijî estê. Efrînijê ke îşxalê dewleta tirke ra dima neçare mendî ke koç bikerê 5 kampanê Şehba de manenê.

Kampa Vegerê: 455 kesî

Kampa Şehba: 459 kesî

Kampa Serdemî: 3 hezar û 85 kesî

Kampa Berxwedan: 2 hezar û 647 kesî

Kampa Efrînî: 398 kesî

Rojhat Elîyî da zanayene ke îmkanê Îdareyê Xoserî tay ê û coka kapman de eşkeno tay tabdîran bigêro. Na çarçewe de Îdareyê Xoserî dekewtiş û vejîyayîşê kampan qedexe kerd û derheqê Korona de pê vilawekan zanayîş da şarî. Rojhat Elîyî vat: ''Tebdîrê ke ameyî girewtene qîm nêkenê labelê îmkanê ma hende yê. Ganî dezgehê weşîye û hetkarîya merdimîye yê mîyanneteweyî tebdîran bigêrê.'' Rojhat Elîyî îfade kerd ke hewteyê vîyarteyî de bi beşdarîya Heyetê Weşîye, Heyva Sor a Kurdî û 33 dezgehanê hetkarîye herême de 2 kombîyayîşî ameyî kerdene û vat: ''Ma nê kombîyayîşan de rewşa kampanê Rojawanî ser o vindert. Temsîlkarê UNICEFî û Xeçê Sorî zî tewrê kombîyayîşan bîyî. Ganî seba pêro kampan tebdîr bêro girewtene. Ganî seb anêweşan nêweşxaneyê demkîyî bêrê awankerdene. Ma na babete pêşnîyazê dezgehanê hetkarîye yê mîyanneteweyîyan kerde. Her çî ra verî ganî komîteyêke bêra awankerdene û dest pê karî bikera. Nêbo do erey bibo. Dezgehanê hetkarîye û Rêxistina Weşîye ya Dinya cewab nêda ma.''

Hemserekê Ofîsê Karanê Multecîyan ê Îdareyê Xoserî Şêxmûs Ehmedî zî ard ziwan ke Rêxistina Weşîye ya Dinya, Xeçê Sûrî û Heyva Sor a Sûrîye seba multecîyan tebdîrî nêgirewtî.Şêxmûs Ehmedî vat: ''Rêxistine Weşîye ya Dinya zî hetkarîya seba koçberan û multecîyan vindarnaye. Çunke tersenê ke xebatkarê înan nêweş bibê.'' Şêxmûs Ehmedî venga dezgehanê hetkarî yê mîyanneteweyîyan da ke babeta hewcedarîyan û weşîye de hetkarîya multecîyanê herême bikerê.