Dima ke mabênê hukmatê Iraqî û PDKyî de 9ê teşrîna verêne ya 2020î de Peymana Şingalî amebî kerdene teda û hêrişê vera Şingalî zêdîyayî.

Îdareyê Xoserî yê Şingalî perey da pêhesnayene ke PDK pê hêzanê xo yê çekdaran cehd keno ke debikewo Şingalî û vat ê do çirey destûrê naye medê û xo bipawê. Dima ra vizêr dormeyê Şingalî de saetanê serê sibayî de têgêrayîşê leşkeranê PDK û artêşa Iraqî qewimîya. Şarê Şingalî vera naye vejîya kuçeyan. 

Şarê Şingalî  ke vejîya kuçeyan heme rayîrê ke yenê Şingalî wesayîtan rê qefilnayî û vera hêzanê PDKyî çalakîya roniştişî kerde. Şarî da zanayene ke ê do qetî destûrê hêzanê çekdaran ê PDKyî nêdê. Netîceya xoverdayîşê şarî Şingalî de hêzê PDKyî peyser agêrayî. La herême de hema zî alozîye dewam kena.

Hetkarê Hemserekanê Îdareyê Xoserî yê Rojawanî Hesen Koçerî derheqê mesele de ANFyî rê qisey kerd.

Hesen Koçerî ard ziwan ke hêrişê vera Herêmanê Pawitişî yê Medya, hêrişê vera Şingal û Rojawanî parçeyê konseptê qirkerdişê kurdan o û vat: ''Dewleta tirke û PDK nêeşkayî hêrişanê vera gerîlayan ra netîce bigêrê. Rojawan û Şingal de zî înan hêrişê noqtayanê sivîlan kerd. Semedo ke 9ê teşrîna verêne beno nêzdî. 9ê teşrîna verêne semedê kurdan tarîxêko dejin o ke a roje vera Rayber Apoyî komplo ame kerdene, Serêkanîyê û Girê Sipî îşxal bîyî. Tay kurdê xayînî qirkerdişê dewleta tirke yê vera kurdan tesdîq kenê.

Bara PDKyî mîyanê nê hêrişan de esta. PDK xo vîr a nêkero ke 3ê tebaxa 2014î de Şingalî ra remayo. PDK bi kmayew rîyî şino Şingal. PDK Şingalî ra rema, bi hezaran cinîyê êzidîyî kewtî destê DAÎŞî, bi hezaran merdimî kişîyayî. Şarê Şingalî îdareyê xo yo xoser awan kerdo, ti çira vanî 'ez do şora Şingalî.' No povokasyon o. Ê wazenê destkewteyanê şarê kurdî çin bikerê.''

Hesen Koçerî îfade kerd ke PDK komployanê dewleta tirke ano ca û vat: ''Tirkîya pê destê PDKyî komployanê xo ana ca. PDK herinda ke rexneyê xo bido dewleta tirke reyde têgêreno. Wa şarê ma yê êzidîyî ney xo vîr a nêkero. Şarê Şingalî do qetî agêrayîşê PDKyî qebul nêkero. Rojawan de zî ENKS sey PDKyî têgêreno. ENKS waştişê Tirkîya ser o wina têgêreno ke Amerîka û Ewropa QSD û PYDyî bikerê mîyanê lîsteya terorî.  Nê pêro semedê qirkerdişê kurdan yenê kerdene.

Wa PDK bizano ke kurdî hînî hişyar bîyî. Wa PDK hînî qala kurdayetîye mekero. Înan 10 gerîlayî şehîd kerdî, temsîkarê Îdareyê Xoserî tepiştî. Ê xayîn ê. Hêrişê vera Şingal, gerîlayan û Rojawanî planê dewleta tirke yê. PDK zî paştî dano nê planî. Wa şarê Başûrê Kurdîstanî vera nê xayînan tewirê xo bimojno. Înan wextê qirkerdişî de şarê ma war verda û remayî. Nameyê Îdareyê Xoserî yê Rojawanî ser o ma şarê Şingalî û Îdareyê Xoserî yê Şingalî reyde yê. Ma paştî danê pawitişê meşrûyî yê Şingalî.''