Dewleta tirke ya îşxalkere 9ê teşrîna verêne ya 2019î de hêrişê Serêkanîyê û Girê Sipî kerdbi. Hêrişan de bi hezaran kesî şehîd û birîndar bîyî, bi seyan domanî bêwayîr mendî û hemwelatîyê Serêkanîyê û Girê Sipî neçare mendî ke koç bikerê. Îdareyê Xoserî tay hemwelatîyê Serêkanîyê Kampa Waşokanî ya Hesekê de ca kerdî. 

Hemwelatîyê Serêkanîyê mîyanê şer û mercanê zehmetan ê kampe de zî xo ver danê ke rojêke abigêrê wareyê xo. Şar û îdarekanê kampe ANFyî rê qisey kerd û hîsê xo ardî ziwan. 

Hemserekê Meclîsê Kampa Waşokanî Eladîn Cemal Elîyî vat: ''Teşrîna peyêna ya 2019î de Îdareyê Xoserî semedê koçberanê Serêkanîyê Kampa Waşokanî awan kerde. Kampe de 2309 keyeyî 1987 xeyman de manenê. Nê kesî koçberê Serêkanîyê, Zirgan û Til Temirî yê. Kampe de xeylêk kêmasîyî estê, merkezê weşîye teng ê û ambulans çin o. Rêxistin û dezgehê mîyanneteweyî qetî hetkarîya kampe nêkenê. Zimistan zî dîya. Şarê kampe reyna zî xo ver dano. Ez venga pêro dezgehan û dewletanê mîyanneteweyîyan dana ke wa hetkarîya kampe bikerê.''

Koçbere Şemse Mihemed Bekîr vat: ''Ma dewa Xabûrê ya Serêkanîyê ra koç kerd. 2013 de zî DAÎŞî hêrişê dewe kerdbi la dima QSDyî dewa ma xelisnaye. Ma dewe de bi aramîye ciwîyayêne. La dima dewleta tirke hêrişê ma kerd, erdê ma îşxal kerd.  Wa dezgehê mîyanneteweyî eşkera bikerê ke çira dewleta tirke erdê ma îşxal kerd, ma se kerd aye? Heta ke ê welatê ma ra şorê ma tîya de xo ver bidê.''

Hemsereka Kampa Serêkanîyê Ezîze El Xenafir vat: ''Heta nika têna Îdareyê Xoserî hetkarîya kampe kerde. Semedo ke zimistan dîya zehmetî zî dest pêkerd. Key varan û vewre bivarê xeymî benê gol. Hetê weşîye ra zî têna Heyva Sor a Kurdîstanî hetkarîya ma kena, sewbîna qet yew dezgehê weşîye paştî nêdano ma. Şarî bira xo daye ke tîya de bimano la çimê înan hertim rayîre agêrayîşê Serêkanîyê de yê.''