Dewleta tirke xîret kena ke DAÎŞijan Kampa Holî ra biremna. Cinîyanê DAÎŞijan Elîfe Sancar û Fatma Ridvan Aus zî xîret kerdêne pê tankerê awe kampe ra biremê la dima ameyî tepiştene. Elîfe Sancar pare kerd ke seba ke kampe ra biremê Weqfa Hetkarîya Merdimîye (ÎHH) înan rê hetkarîya madî û lojîstîke kerde.

Elîfe Sancara 24 serre Amedî ra ya. Elîfe îdîa kerd ke a serra 2014î de peyê mêrdeyê xo de ameya Sûrîye.Elîfa ke mêrdeyê ci şerê Sûrîye de merdo, adara 2019î de teslîmê QSDyî bîye û ameya Kampa Holî.  Elîfe vat înan waşt ke kampe ra biremê û wina dewam kerd: ''Birayê mi Tirkîya de ciwîyeno. Ma telefon de qisey kerd, ey vat 'Pere û rayîr hetê ÎHHyî ra do bêrê eyarkerdene. Birayê mi, mi ra qeyd waşt. Nê qeydî mojnenê ke ma kampe de yê. Tay zanayîşî zî waştî. Înan çi ma ra waşt ma da ci. Ê do pere bidayêne ma zî do biremayêne.'' Elîfe ard ziwan ke cinîyî exlebî pê rayîrê tankeran kampe ra remenê Tirkîya û dewleta tirke 'înan wazena'.

Fatma Ridvan Ausa çeçene zî nê çîyî vatî: ''Ma zanayêne ke kampe de xeylêk wayî pê rayîrê ÎHHyî remayî. ÎHH cinîyan beno Cerablus û uja ra zî beno Tirkîya. Ma seba remayîşî cinîyêka bi nameyê Umu Muhammed Turkî de qisey kerdêne ke Îdlîb de ciwîyayêne. A cinîye mi rê vat seba remayîşê rayîrêko asanêr zî esto. Vat ez şora seba 'artêşa azade ya Sûrîye' qeydê xo bikera. Bi nê hawayî ez bi rehetî  eşkena xo biresna Tirkîya. ''