Hemserekê Meclîsê Qanûndayîşî yê Reqa Xalid Bekîrî bi wesîleya serrgêra xelisnayîşê Kobanê ANFyî rê qisey kerd.

Xalid Bekîrî da zanayeneke DAÎŞî seba ke îradeyê kurdan bişikno hêrişê Kobanê kerd û no zî bi sereyê xo nêkerd. Bekîrî vat: ''Kobanê ruhêkê xoverdayîşî tarîxî rê verda. Dewleta tirke seba binkewtişê Kobanê zaf xîret kerd û paştî da DAÎŞî. La xoverdayîşê Kobanê pêro dinya ra vila bi. Bi taybetî vengdayîşê Rayber Apoyî ra dima merdimî herikîyayî Kobanê. Ney ruhê xoverdayîşî û hêvîya azadîye ya Kobanê vistî verê çiman. Nê ruhî Kobanê xelisnaye. Binkewtişê Kobanê yê DAÎŞî gama verêne ya binkewtişê ci bîye. Coka dewleta tirke hema zî hêrişê Kobanê kena.''

Bekirî îfade kerd ke wextê şerê Kobanê de tewr zaf nê serebûtî tesîrê ci kerdo: ''Wexto ke şarî koç kerdêne şerwanî zaf kewtêne ver. Vatêne werrekna ê şehîd bîyêne la nê dîmenî nêdîyêne. Xora nê şerwanan heta peynî xo ver da û şehîd bîyî. Wexto ke merdimî kewtêne mîyanê kuçeyanê Kobanê boya xoverdayîşî her cayî ra ameyêne. Sembolêko bîn ê xoverdayîşê kobanê şerwanê YPJyî bîyî. Dinya de reya verêne cinîyan şer û şorişî rê rayberîye kerdêne. Kobanê de cinîyan têna şer nêkerdêne, fermandarîye zî kerdêne, şer îdare zî kerdêne. Xora ney dinya de zaf veng vet.''