Rojawanî de serra 2012î ra nata şer esto. Tewr zaf cinîyî tesîrê na rewşe de manenê. Herême de cinîyî serranê qijkekan de dîyenê zewijnayene, kişîyenê. Kobanê ke bi hetkarîya rêxistina mîyanneteweyî MDM seba ke merkezê psîkîyatrî bêro akerdene xebatî yenê kerdene.

Wekîla Serekîya Cinîyan a Herêma Firatî Rozîne Muhemed derheqê xebate de qisey kerd. Rozîne vat: ''Ma serra 2020î de seba merkezî xebate daye destpêkerdene. No proje têna seba cinîyan nê her kesî yo. Merkezê ma de doktorê psîkolojî do bixebitê.

Nê wextanê peyênan de kişîyayîşê cinîyan zêdîyayî. Sebebê nê kişîyayîşan zewajê rewî, şîdetê zereyê keyeyî û komelo feodal o. Ma do xebata xo ya merkezî xîret bikerê ke verê kişîyayîşê cinîyan bigêrê. Ma taxan de Kongreya Starî, Rêxistina Têkoşînê Vera Şîdetî ya Sara û Wezaretê Cinîyan reyde pêvînayîşan kenê û derheqê meseleyanê cinîyan de zanayîşî arê dayî. Cinîyî eşkenê her carî ra xo biresnê ma.''