Şarê Kantonê Efrîn-Şehba ancî rayîrê koçberîye de yo. Şar hetê Îdareyê Xoserî ra tay merkezan de yeno cakerdene.

Bi seyan keyeyan zî verê xo da Kobanê. Kobanê de keyeyî ameyî vengkerdene û nê seba koçberan ameyî cakerdene. Firinî zî nan bê pereyî danê şarê Efrîn-Şehba.

Ehmed Mistefa Hebeşo ke Kampa Serdemî ra koç kerdo vat ke ê vera cergan rayîrê xoverdayîşî kenê esas û vat: ''Ma Şehba ra bi korîdorê merdiman vejîyayî. Seba kesanê bêwesayîtan zî otobusî ameyî peydakerdene. Tek çareya ma agêrayîşê Efrînî yo. Efrîn seba ma cuye yo. Senî ke Kobanê azad bîya, Efrîn zî do azad bibo.''

Hetê bînî ra Meydanê Şehîd Egîdî de zî xeymê hetkarîye ameyî ronayene, tîya ra îhtîyacê şarî yenê peydakerdnee.

Hemsereka Sendîkaya Mamosteyan a Kantonê Firatî Narîne Muslîm ard ziwan ke dewleta tirke îradeyê şarî kena hedef la şarê kurdî bi yewîya xo do rayîr nêdo îşxalî. Narîne vat: ''Ma sey şarê Kobanê yew karê hetkarîye da destpêkerdene. Ma nameyanê keyeyanê koçberan gênê û îhtîyacan şawenê keyeyanê înan. Ma heta peynî seba şarê Efrîn-Şehba seferber bibê.''

Domanê bi nameyê Niman Bozanî vat: ''Ê koçberê ma yê; xora ma do ardimê înan bikerê. Ez xercîya ke keyeyê mi seba dibistane dano mi, dana îhtîyacanê koçberan.''

Hetê bînî ra dewa Gulmitî de zî seba koçberan merkezê weşîye ame awankerdene. Doktor Şêxo Mistefayî vat: ''Pêro doktoran vat ke ê do îhtîyacanê şarî bê pereyî bidê. Ma dewa Gulmîtî de kombîyayîş kerd, xeylê nêweşî ardî tîya, domanî tedawî kerdî. Ma do tim hetkarîya koçberan bikerê.''