Kombîyayîşê serrane yê QSDyî pê beşdarîya pêro meclîsanê leşkerîyan, hêzanê YPG û YPJyî, meclîsanê leşkerîyanê ereb, senadîd, sûryanîyan û pêro şaran dest pêkerd. 

Kombîyayîşî saete 11.00 de merkezê Fermandarîya Pêroyî ya Hesekê de dest pêkerd. Fermandarê Pêroyî yê Koalîsyonê Mîyanneteweyî yê vera DAÎŞî Paul Calvert û Partîyê Yewîya Neteweyî (PYNK), Meclîsê Sûrîyeya Demokratîke (MSD), Îdareyo Xoser, Kongreya Starî, Yewîya Cinîyan ê Sûryanîyan, kokimî, keyeyê şehîdan û eşîrê erebî zî tewrê kombîyayîşî bîyî.

Kombîyayîş de verî Serfermandarê QSDyî Mazlûm Ebdîyî qisey kerd û bale ante sûcanê şerî yê dewleta tirke ser. Ebdîyî pare kerd ke ê do qetî têkoşînê vera DAÎŞî dewam bikerê, herêmanê îşxalkerdeyan azad bikerê.

Fermandarê Koalîsyonê Mîyanneteweyî Calvertî zî îfade kerd ke ê do hetkarîya bi têkoşînê vera DAÎŞî rê dewam bikerê.

Nameyê Îdareyê Xoserî yê Rojawanî ser o Abid Hamid El Mahbaşî qiseykerdişê xo de pare kerd ke sîstemê xoserîye do meseleyanê Sûrîye çareser bikero.