Dima ke dewleta tirke ya îşxalkere û cerganê ci 9ê teşrîna verêne ya 2019î de hêrişê Serêkanîyê kerd tewr tay 300 sivîlî neçare mendî ke koç bikerê. Tewr zaf cinî û domanî binê tesîrê nê koçî de mendî.

Cinîyan ê koçberan ê Serêkanîyê û Ebû Raseynî serrgêra 2. ya hêrişan de ANFyî rê qisey kerd. 

Îdarekara Kampa Waşokanî Stêra Reşik vat: ''Şarê Serêkanîyê pê zorî ame koçkerdene. A roje semedê kurdan û şaranê Rojawanî rojêka tarîye bîye. Dewleta tirke pêro çekê giranî vera ma xebitnayî, pê çeka kîmyewîya ma dayî bombayan ver. Ma semedo ke domananê xo bipawê Serêkanîyê ra vejîyayî. Ma do çekanê xo bigêrê, hetê şerwananê QSD-YPG-YPJyî de ca bigêrê û semedo ke abigêrê şaristanê xo têkoşînî pîl bikerê. Ma do meydananê Efrîn, Girê Sipî û Serêkanîyê de govenda azadîye bigêrê.''

Koçberanê Serêkanîyê ra Leyla Ehmed Nebî vat: ''Ma têna domanê xo girewtî Serêkanîyê ravejîyayî, ma ganê xo xelisna. Ê ma wesayîtê ma estbi. La merdimê feqirî pê payan şîyî. Rojê zor û zehmetî bîyî. Mêrdeyê mi nêweşê dîyalîzî yo, ma pê zorî o şaristanî ra vet. Nika ma xeyman de bi zorî ciwîyenê. Ma têna wazenê hînî abigêrê erdê xo. Wa Homa ney Erdogan û hemkaranê ci rê meverdo.''

Suade Ehmed Mehmûd vat: ''9ê teşrîna verêne ra verî zî gefî estbîyî. A roje saete dormeyê 4î de hêrişî dest pêkerd. Ma çîyêk nêgirewt, Serêkanîyê ra vejîyayî. Ma şîyî dewa xo la înan da dewe ro zî. Ma bi neçarî bi temamî şaristan terikna. Ma abigêrê nanê wişkî zî biwerê beno.''

Fatma Muhammed Ehmeda ke koçbera Ebus Raseynî ya, ereb a û Kampa Waşokanî de manena vat: ''Sey yew cinîye mi zaf zehmetîye ante. Bombayî varayêne her cayî. Ez semedê domananê xo erdê xo ra vejîyaya. Nika ma kampe de yê. Rewşa ma xirab a la tewr nêbo ma pê rûmetê xo ciwîyenê. Rojêke ma do abigêrê erdê xo. Êyê ke vera hêrişan şaristanê ma pawenê do şaristanê ma azad bikerê.''