Semîre Ehmeda 47 serre dadîya 8 domanan a. 2 lajê aye û kênayêka ci Xoverdayîşê Kobanê de şehîd bîyî.

Dayîke Semîre wina qala Xoverdayîşê Kobanê kena:

''Ez wextê şerî de zî tewr Kobanê ra nêvejîyaya. Ma şerwanan rê werd pewtêne. Nê şerwanî hende rind bîyî ke çew qemiş nêbîyêne biewno înan. Cergan o çax sereyê kokimêkî birnabi û kokimêk zî pê keyeyê ci vêşnabi. Wexto ke şer bibi xidar Kobanê de şerwanan ra YPG û YPJyî ra ber çew nêmendbi. Ma vera cayê xo vurnayêne.

Wextêko winasên bi ke milçîkî zî perraybî şîbî... Têna tay şerwanî estbî. Têna tay şerwanê cinîyî estbî. Ez şîya hetê înan de ronişta. Seke ma bêwayîr mendî, hende ma xo ra şîbî. Mi şerwanan ra persa ke gelo Kobanê do bixelisa. Şerwanêka vakurije vat 'Meraq meke dayê ma do heta çilka peyêne ya gonîya xo şer bikerê û Kobanê azad bikerê.' Mi vatişê aye ra dima tîlîlî kerd. Axir ma ser o a giranîye şibî.

Şer de mi dî ke şerwanêk pê gonîya x dêsî ser o 'Ez deyndara Kobanê ya' nuşto. Lajê mi Agîd YXK de şer kerdêne, krîzê qelbî ra şehîd bi. Lajê mi Harun 2015 de şehîd bi. Harûnê mi şehadetê xo ra verî mi rê vat eke o şehîd bibo ez do qetî nêberma û merasîmê ey de ez deyîran vaja. Mi lapatêk da ci ro û mi vat 'ti çira wina qisey kenî?' Wexto ke Harûnê mi şehîd bi mi waştişê ey ard ca.

Kênaya mi Jine zî pa 16 embazanê xo Şêxler de şehîd bîye û cenazaya aye erşawîyaye Cerablus. Mi hema cenazaya aye nêgirewte. Harûnî tim vatêne o do cenazaya Jine mi rê bîyaro.

Şerê Kobanê zehmet bi. ma şerwanan rê nan pewtêne, kincê înan şitêne, ma moral dayêne înan. Ge ge zî înan waştêne ma şorê cayê înan xoşebere bikerê.

Rojêke birîndarêk ame nameyê ci Yilmaz bi. Ey vera vatêne 'dayê dayê dayê.' Mi vat ez dadîya to ya. Çimê xo akerdî û vat: 'Dayê çi gureyê to tîya de esto? Ti zî şer kena?' Mi vat 'Ê lajêm ez zî ameya şer. Sey mi tîya de zaf dadîyî estê.' Yilmazî vat 'Ti raşt vana.' Saetêke ra ey Yilmaz şehîd bi.

Gonîya şehîdan erdê Kobanê kerd hît. Kobanê sayê şerwanan de bi taybetî sayê şerwananê cinîyan de xelisîyaye. Wa kurdî na raştîye xo vîr a mekerê. ''