Sara Elî Xelîla  41 serre Kobanê de sey 'dayîka Sara' şinasîyena. Sara El Xelîl dadîyêka ciwane ya ke 4 domanê ci estê. Sara 16 serrê xo yê peyênî dîyarîya şorişê Kurdîstanî kerdî. Şerê Kobanê de aye pa camêrdê xo xizmetê cepheyî kerd. Mêrdeyê aye Mahmut Qirkerdişê Kobanê de şehîd bi.

Sara wina qala ê rojan kena: ''Wexto ke dişmen kewt Kobanê kurdan rê zulm û zorbazîya pîle ameye kerdene. Wexto ke ma Şorişê Rojawanî ard ca alaya kurdan vejîyaye ser. Ma dezgeh û rêxistinê xo awan kerdî, ma xo rêxistin kerd û ma bi ziwanê xo perwerde girewtêne. Kurdan destê rejîmî ra xo xelisnabi. Wexto ke DAÎŞî dest pê hêrişan kerd û xîret kerd ke bikewo Kobanê embazan va 'ma do heta peyêne xo ver bidê û nêverdê ke nê cergî bikewê Kobanê.'

Wexto ke hêrişî bîyî giranêr şar neçare mend ke koçê vakurî bikero. Şarê ma yê Vakurê Kurdîstanî paştî û hetkarîyêka pîle daye ma. Ma do qet ked û hetkarîya înan xo vîra nêkerê. Ez û 4 embazî ma cephe rê nan pawtêne, werd viraştêne. Ma xebatê xo camî de kerdêne. O çax cergan vatêne 'ma do nimajê roşanî camîyê Kobanê de bikerê.' La înan nê ma uca de nimaj kerd. Mêrdeyê mi Mahmut cephe de şer kerdêne. Rojêke ey mi rê telefon kerd û bi israr waşt ke ez şora Vakur. Mecbûr ez şîya domanê mi estbî. Mêrdeyê mi Kanîya Kurda ya Kobanê de bi. Mi zanayêne ke o do nêeşko uca ra vejîyo. Hewteyêkî ra dima kênaya xo Şîlane reyde ez agêraya Kobanê.

DAÎŞî Kobanê serûbin kerdbi, tede çew nêmendbi. Şerwanî birîndar bibî. Mêrdeyê mi zî lîngê xo ra birîndar bibi.

Dima Kobanê azad bi. Roja qirkerdişî ameye. Serê sibayî vengê teqayîşî ame. Mehmûdî çeka xo girewt û şi teber. O zî nê qirkerdişî de şehîd bi. Ez xeylêk nêeşka ey ra xebere bigêra. Dima embazêke vat 'embaz Mahmud şehîd bi.'

Peynî de sey vatişê Erdoganî nêbi. Kobanê bîye azad. Planê înan pûç bîyî. Her parçeyê Kurdîstanî de, her cayê dinya de kam ke seba Kobanê kede daye Kobanê hînî keyeyê înan o.''