Endamê Konseya Hemserekîye ya PYDyî Salih Muslimî derheqê hêrişê DAÎŞî yê Hesekê de ANFyî rê qisey kerd.

Muslimî vat: ''Pêkewtişanê dergan ra yeno famkerdene ke planê hêrişî pîl o. Hêrişî teberî ra ameyî plankerdene. Mengekê verî çeteyêkê DAÎŞî ke operasyonê QSDyî de amebi tepişene qala nê hêrişî kerd bi. Heme muhîmat û lojistîk herêmanê ke binê îşxalê dewleta tirke de yê û Iraqî ra yenê. Engişta înan zî hêrişî de esta. Senî ke eseno wextêko hêriş yeno plankerdene. No qewimîyayîş nişka nêbi. Eşkerayo ke hêriş verî ra ameyo plankerdene. Cayanê sîvîlan de cepilxane ameyo cakerdene. Pê hucreyanê nimiteyan ê ke semtanê Hesekê de nayî ro heta zîndanî ameyî. Çeteyanê bînan zî zere de têmîyankewtiş vet. Tayînan waşt biremê. Tay remanê semtanê bînan ê bajarî. Hêzanê Asayîşê Zereyî semedê tepiştişê înan pêroyê Hesekê qedexeyê teberbervejîyayîşî îlan kerd.''

Muslimî wina dewam kerd: ''Kombîyayîş Astana de des madeyan ra heştê înan derheqê Rojawanî de bî. Nê pêroyî konseptêk o. lingêka hêrişî no yo. ablûqaya Şehba ra heta Zîrganî, qefilnayîşê berê sînorî ke hetê Başûrê Kurdîstanî û rejîmê Sûrîye ra ameyî qefilnayene, çekedayîşê çeteyanê DAÎŞî yê ke kampe û zîndan de yê leteyêkê nê konsept o. Çend tengayî vejîyo hende gureyê înan raşt şino. Dewleta tirke hêriş kena ke tîya îradeyî birijno. Heta nika heme çeteyê DAÎŞê ke ameyî tepiştenê eleqaya înan bi dewleta tirke esta. Coka nê hêrişî têna hetê DAÎŞî ra nêameyî kerdene.''

Salih Muslimî bêxemîya hêzanê mîyanneteweyî zî vist vîrî û vat: ''Ganî heme dinya tehlukeyê DAÎŞî bivîno. Eke çeteyê DAÎŞî biremê no tewr zaf welatanê Ewropa ser o do tesîr bikero. Eke raşta wazenê terorîzmî ra bixelisîyê ganî herême rê hetkarî bikerê. Hêzê mîyanneteweyî ganî tehlukeyî bivînê û wezîfeyê xo bîyarê ca. Wa mehkemeya mîyannetweyî bêro ronayene û çeteyî bêrê muhakemekerdene. Xora çeteyê ke Kampa Holî de yê problemêko bîn o. Rojane yewbînan kişenê. Ma qîrênî vanê înan tîya ra bîgêrê.  Ma do sey verî reyna vera hêrişan xover bidê. Ma rîyê hêrişan ra cuya xo ya azade û projeyanê xo yê demokratîkan canêverdenê. Wa her kes bizano ma do xover bibê.''