Hemserekê PYDyî Salih Muslimî vat: ''Tirkîya semedê haştîya mendîye ya Sûrîye bîye asteng. Bi tersê  eke Sûrîye de haştîye û çareserî bibê kurdî tay heqan fînenî dest, seba ke haştîye mebo çîyo ke destê ci ra ame kerd.''

Hemserekê PYDyî Salih Muslimî bi wesîleya serrgêra hêrişê îşxalî yo ke 25ê hezîrane de dîya destpêkerdene ANFyî rê qisey kerd.

Muslimî vat hêrişê vera Kobanê yê 25ê hezîrana 2015î wina bîlesebeb û bêhesab nêame kerdene û verê ci peyê ci nîşan dayî. Muslimî nê vatî: ''Verê ci Kobanê de têkoşîno tarîxî ame kerdene. Bajarêko xerîta de cayê ci nêameyêne zanayene verê çimanê dinya de semedê heme merdimîye bi mengan têkoşîno gird ame ciwîyayene û netîceya nê têkoşînî de dişmeno tewr pîl merdimîye DAÎŞ bin kewt. Xora Erdoxanî bi vatişê 'Kobanê kewt, do bikewo' mojnayêne ra ke tay hesabê ci est ê. Erdoganî 2012yî  ra sey Nusra tay grûbê çeteyan ê bînameyê bînan weyekerdene û verdayêne kurdan. Tewr peynî de DAÎŞ verda kurdan. Seba ke DAÎŞ zî bin kewt, no bi kul kewt zerrîya Erdogan û faşîzmê tirkî.  O wextî ra înan qet xo vîra nêkerd.

Erdogan tim tehdîtanê xo vano ê do verî Kobanê ra dest pê bikerî. Kobanê kewna hewnê ci.  Xora semedê têkoşînê tarîxîyî yê Kobanê çi vaje zi qîm nêkeno, kêm menano. Kobanê ke şehîdê çar leteyanê Kurdîstanî est ê. Silêmanî ra heta Mahabad, Wanî ra heta Qamişloyî her cayî ra şehîdî Şehîdgehê Kobanê de yê. Coka Kobanê yê ma perûn a, yê heme kurdan a û bîya sembolê dinya. Eynî wextî de sembolê tersê zerrîya dişmenî ya zî. Serkewtişê Kobanê ra 8 serrî cuwa pê dewleta tirke bi nameyê 2Dewaya Kobanê' de cezaya bi seyan serran da paştgeranê Kobanê. No zî mojneno ke no serkewtiş senî bîyo kul kewto zerrîya înan.

Serkewtişê Kobanê planê dewleta tirke yê vera herême zî vetî werte. No plan 2014 de semedê tesfîyekerdişê şarê kurdî û Têgêrayîşê Azadîye yê Kurdan amebi kerdene û bi şerê Kobanê ame destpêkerdene. Eslê xo de Kobanê pêro kayê dişmenî vete werte.Vakur de 'Planê Çokdayîşî' dîya destpêkerdene. Prosesê dîyalogî nişka ame vindarnaye,rejîmê Tirkîya bedilîya. Koalîsyonê Erdogan û Gulenî rijîya herinda ci  koalîsyonê Erdogan, Ergenekon û MHPyî ame ronayene. Erdoganî pêro mafyayî dormeyê xo de kom kerdî. No semedê şerê bi kurdan kerd. înanê ke serranê 90yan de kurdî qetilkerdêne pêro girewtî cayê xo û  newe ra destpê qirkerdişê kurdan kerd.

Dewleta tirke bi hêrişê vera ma peynîya xo zî ana.  Dewletê mîyannetweyî semedê ma vengê xo nêvejenê, pêro goreyê menfeatê xo têgêrenê. Hem yew dewlete nêvato şima qey vera weçînayîşê Rojawanî vejîyenê. 1993 ra nata çekanê kimîyewîyan şuxilnenê. Dinya tim nê ya nimnena ya zî nêvînayîşî ra yena. Xoverdayîş û têkoşînê çar leteyanê Kurdîstanî do peynîya ey bîyaro.''