Endamê Komîteya Hemserekîye ya PYDyî Salih Muslimî bi wesîleya serrgêra cerganê DAÎŞî ra pakîkerdişê Kobanê ANFyî rê qisey kerd.

Muslimî vist vîrî ke o çax rojawanê Serêkanîyê ra heta Efrînî herême destê DAÎŞî de bîye, sînor de têna Kobanê mendbî. Muslimî vat: ''Cerablusî ra heta rojawanê ci; Ezaz û Minbic destê DAÎŞî de bîyî. Têna Kobanê mendbî. Coka DAÎŞî giranîye daye Kobanê ser ke pêro herême kontrol bikero. Eke DAÎŞ biameyêne dima Tirkîya û komê bînî yê cergan zî do biameyêne. Plan no bi. Tirkan, OSO û DAÎŞî ra waştêne ke pîya hêriş bikerê, Kobanê bifatisnê û teslîm bigêrê. La Kobanê de DAÎŞ ame binkerdene. Kobanê coka hem sembolê serkewtişî hem zî sembolê şorişî yo. Binkewtişê Kobanê yê DAÎŞî Tirkîya rê bîyo meseleya rûmetî û qesasî. Ê her firsend de wazenê reyna Kobanê bivisnê destî. La seba kurdan zî Kobanê sembolê rûmetî yo. Sembolê yewîya kurdan o. Coka ê wazenê kobanê çin bikerê.''

Salih Muslimî hêrişê vera Zîndanê Sinaa yê Hesekê wina ercna: ''No planêko pîl bi. DAÎŞî tecrube û paştdayîşê xo vist dewre. No plan 6 mengan de ame amadekerdene û pêro detayî ameyî hesabkerdene. La DAÎŞ Hesekê de zî bin kewt. Senî ke Kobanê de averşîyayîşê înan ame şiknayene, Hesekê de zî metodê înan ê diyînî ameyî şiknayene. No seba DAÎŞ û destekkaranê ci bi derse. No plano ke eleqeyê ci bi biranê Astana estbi, planê çinkerdişê sîstemê Rojawanî ra parçeyêk bi. Verî zî ambargo ronîya, berê sînorî ameyî qefilnayene, cerganê Tirkîya reyde pêro cepheyan hêriş kerd. No yew darbe bi. Plan ame pûçkerdene.''