Dîcle Şêxo rojnemegeranê şerî yê Rojawanî ra ya. Dîcle wextê Xoverdayîşê Kobanê de bîye çim û goşê Kobanê. Şerî ra verî pê zorî kesêkî reyde dîtinê Dîcle amebi kerdene. Rojnamegere Dîcle roşan de do veyve bikerdêne. La aye a roja roşanî kamuflaj xo rê da û hacetê xo yê rojnamegerîye û leşkerî girewtî xo destî û vat: ''Hînî veyvekinîyê mi nê yê. Ez do biba veyva Kurdîstanî.''

Rojnamegere Dîcle wina qala hîkayeya xo û yê Xoverdayîşê Kobanê kena:

''Wextê Şorişê Rojawanî yê 19ê Temmuze de ma agêrayî Kobanê. Babîyê mi nêwaşt hînî ez xebatan de ca bigêra. La mi ey ra mîyankî karê rojnamegerîye kerd. Dima keyeyê mi zî bi nerm û ez bi temamî tewra çapemenîye bîya. Rojêke keyeyê mi pê zorî ez daya lajê amika mi. Mi 1,5 serre karê veyveyî taloq kerd. Roşan de qaşo ez do bizewijîyayêne.Roşan de Şerê Kobanê estbi. Keyeyê mi waşt ke ez Kobanê ra vejîya la mi qebul nêkerd.  Ez senî eşkayêne şerwanan biterikna!

Şer de ma şîyî cayanê bitehlukeyan. Ma şerwanan ra moral girewtêne. Ma hem xeberî kerdêne hem zî hîkayeyê şerwanan arê dayêne.

Dima ke DAÎŞ kewt Kobanê ma nêçarîye ra şîyî Pirsûsê Riha. La uca de ma 15 rojan nezaret de mendî, îşkence dî. Dima ke ez nezaretî ra xelisîya ez agêraya Kobanê.

Şerê Kobanê giran bi û şar zî pêrişan bibi. Domanan vatêne qey ê do hînî nêeşkê abigêrê dewanê xo. Şerwanan de zaf çekî çinbî la cergan de çekê giranî estbî. La îradeyê şerwanan xurtêr bi.

Ma şerwanan reyde roportaj kerdêne la roja bîne ma eşnawitêne ke ê şerwanî şehîd bîyê. Mi vatêne ez do hînî roprtaj nêkera. Çunke mi kamî reyde roportaj kerd şehîd bi. Ez nêeşkena  ê rojan xo vîra bikera.

Kobanê de mi tewr zaf 'ruhê embazîye' fam kerd. Ma sey rojnamegeran yewbînî pawitêne, şerwanan zî ma pawitêne. Zaf rojnamegerî şer de şehîd û birîndar bîyî. Ma kerd ke pê xeberanê xo ruhê xoverdayîşê Kobanê pîl bikerê.

Rpja ke Kobanê bibî azade şayîya şerwanan bêhempa bîye. Her ca ra tîlîlîyê şerwanan ê cinîyan berz bîyêne. Her ca de alayê YPG û YPJyî estbî.

Dima ke Kobanê bîye azad mi nîşanê xo xeripna. Mi embazanê xo ra vatêne 'Hînî kamuflaj û hacetê mi veyvekinîyê mi yê, ez do biba veyva Kurdîstanî.' ''