Merkezê Îrtîbatî yê QSDyî da zanayene ke operasyonê Zîndanê Sinaa yê Hesekê bi hawayêkê serkewteyî qedîyayo. Eşkerayîye de Endama Fermandarîya Pêroyî ya QSDyî Newroze Ehmede qisey kerd û ard ziwan ke înan planêko pîl ê DAÎŞî û terefgîrê ci betal kerdo.

Newroze Ehmed pare kerd ke hucreyanê DAÎŞî bi wesayîtêkê bombakerdeyî hêriş da destpêkerdene û vat: ''Goreyê planî înan do teberî ra ardim bigirewtêne la hêzanê ma cade mudaxele kerd, zîndan û dormeyê ci girewtî binê ablûqa û ablûqaya hucreyan teng kerde. Zereyê zîndanî de tay cergan vera ma şer kerd, tay cergî zî bê şer teslîm bîyî û sewê merkezêkê bînî ameyî kerdene.Seba tepişteyanê bînan nika merkezê bînî yenê amadekerdene.

No hêriş serrgêra ronayîşê Îdareyê Xoserî û hêrişanê vera Efrînî de ame kerdene. No tarîx tesadufî nêbi, ma zanenê ke no hêriş bi planêkê teberî, sere de bi destê dewleta tirke ame kerdene. 

10 hezar şerwanî beşdarê hemleya zîndanî bîyî û roniştoxanê taxanê Xiwêran û Zihûrî de paştî daye ma. Hêzê ma seba ke zerar nêreso şarî bi baldarî têgêra. La hucreyan hêrişan de sivîlî sey tirsî xebitnayî. Hûmara pîle ya cergan kişîyayî. Ma do hûmara zelale dima eşkera bikerê.

Planê DAÎŞî planêko pîl bi û înan waşt Reqa, Dêra Zorê û Holê de zî têmîyanîye vejîyê. Operasyon herêmanê bînan de dewam keno. Zîndanê herêmanê ma de bi hezaran cergî estê. Qedînayîşê tehlukeyê nê cergan têna mesuldarîya ma nê mesuldarîya pêro hêzanê mîyanneteweyîyan o. Ganî her kes mesuldarîya xo bîyaro ca.''