Kelîme Şewket Aldemîr şerê Kobanê de nameyê Dezgehê Keyeyanê Şehîdan ser o Kobanê de mende. Aye ra ber 3 camêrdê bînî zî mendî. Birayêkê Kelîme 90an de Bedlîs de şehîd bîyo. Birayê ci yo bîn zî 30 serran ra nata Têkoşînê Azadîye yê Kurdîstanî de şer keno.

Kelîme û 3 camêrdan şerê Kobanê de wezîfe kerd. Wezîfeyê înan oxirkerdişê şehîdan bi.

Kelîmeya ke pa ê bînan bi mengan bi seyan şehîdî şitî, birînî akerdî û deştî, zanena ke karê înan çend fîraz bi.

Fekê Kelîme ra qala ê rojan wina ya:

''Ma xîret kerd ke şehîdan bi hawayêkê tewr raştî oxir bikerê. Dejê kefenkerdişê ê şehîdan giran bi. Ma ge ge agahîyê şehîdan arê dayêne, ge ge şerwananê YPG û YPJyî agahîyî dayêne ma. Ma vatêne wa şehîdê ma bênasname nêmanê.

Tay keyeyî nêeşkayêne birînan ra domanê xo bişinasnê. Mehmet Zekî Sosyalo nisêbinij wexto ke şehîd bi babîyê ci boya ey ra o şinasna.Ma mabênê şerwanan de cîyakerîye nêkerdêne. Ma xîret kerdêne ke waştiş û wasîyetê înan bîyarê ca. Rojêke di şehîdî ameybî. Rîyê înan de yew huyayîş estbi. Şehîdêk estbi destê ci qerifîyabi la çeka xo nêverdabi.

Seba ke keyeyê şehîdan zêdêr medejê destê ma ra çi ameyêne ma kerdêne. Ma birînê şehîdan akerdêne, deştêne, pakî kerdêne, kefen kerdêne û dekerdêne morg. Ma kerdêne ke keyeyî nê birînan mevînê û domananê xo ra xatir biwazê. Xora cara cigêrê keyeyan vêşaybî.

Ma seba ke biresê keyeyanê şehîdan MEBYA-DERî reyde têkilîye viraştêne. Şehîd Harûn estbi. 3 xalê ey zî şer de şehîd bibî. Rojêke cenazaya Harûnî zî ameye. Mi dî ke gijikê ey lêşin bi. Mi gijikê ey embaz Îbrahîmî zî bedenê ci şit. Ma serê bedenê ci de bermayî. Hêsirê ma kewtî bedenê ey ser.

Rojêke şerwan Hamza ame hetê ma. Ma nan pawtêne. Ey o çax va 'Şima do bivînê ma senî Kobanê azad kenê û dima zî pêro Kurdîstan azad kenÊ.' Dima şer giran bi û o zî şi pêkewtiş. Roja ke Kobanê bîye azad cenazaya ey zî ameye.

Ma zanayêne ke karê ma fîraz o. Ma pê ardimê şerwanan nêverda ke cenazayê şehîdan erdî ser o bimanê.  Eke Kobanê bin bikewtêne pêro Kurdîstan do bin bikewtêne. La ewladanê Kobanê nêverda ke dişmen ser bikewp.

Mi şerî ra dima zî 5 serran xizmetê şehîd û birîndaran kerd. Seke pêro nasê mi şehîd bîyî. Mi hende şehîdî dîyî.''