Hetkarê Hemserekê Meclîsê Rayberdişî yê Îdareyê Xoserî yê Rojawanî Hesen Koçerî vera PDKyo ke Berê Sînorî yê Sêmalka qefilnabi nêrazîbîyayîşê xo mojna. Koçerî derheqê babete de ANFyî rê qisey kerd.

Koçerî vist vîrî ke PDKyî qetî cewab nêda waştişê cenazayan ê şarî û vat: ''Cenazayê domananê keyeyan destê PDKyî de yê. Cenazayî teslîmê keyeyî nênê kerdene. No Rojawan de bi sebebê nêrazîbîyayîşê pîlî. No nêzdîbîyayîşê PDKyî nêno qebulkerdene. Destpêkî ra nata xora PDK bi nê hawayî nêzdîyê şarê Rojawanî bi. PDK tim Berê Sêmalka sey hacetê şantajî xebitnayêne. Bi nê hawayî ey waştêne îradeyê şarî bişikno labelê xo xapîna. Ganî ber sey hacetê şantajî nêro şuxilnayene. Çunke ber meseleya merdimîye ya.

Roja ke PDKyî berî qefilnayî rejîmê Şamî zî qefilnayî.Armancê înan şiknayîşê îradeyê şarî yo. Şarê Rojawanî şorişêk kerd û tira fek vera nêda. Ma do tira fek vera nêdê. Qefilnayîşê beran tedaya sîyasî ya. Wa PDK cenazayanê ma bido.Nika PDK medyaya xo de ropaganda keno. Şer de zî cenazayî dîyenê. Bi rojan keyeyî hê verê Sêmalka de cenazayan wazenê la PDK nêdano. No welatperwerî nîyo.''

Koçerî pare kerd ke PDK bi kerdişanê xo sîyasetê dewleta tirke keno û vat: ''Çîyê ke PDK keno dewleta tirke rê fayde kenê. Dewleta tirke û PDK wazenê îradeyê şarî bişiknê. No caardişê şerê taybetî yo. La ez bi eşkera vana ke şima nêeşkenê îradeyê şarê Rojawanî wina bişiknê. Ma do hewcedarîyanê xo bi her hawayî peyda bikerê. Ez venga şarê ma dana ke pê propagandayanê înan bawer mekero. Ganî şarê ma vera nê sîyasetî hişyar bo û vera ci nêrazîbîyayîşê xo bimojno.''