Hecî Resûl Rojawanê Kurdîstanî ra yo û 80 serre yo. Resûl endamêko verên ê PDKyî yo. Hecî Resûlî 1961 de hemleya kurdan a Başûrê Kurdîstanî de ca girewt. Serra 1985î ra nata zerrîya aye seba PKKyî lerzena. Keyeyê Hecî Resûlî ra xeylêk kesî tewrê PKKyî bîyî û şehîd bîyî.

Hecî Resûlî ard ziwan ke PDK û ENKS goreyê waştişanê dewleta tirke têgêrenê û bi nê hawayî ê PKK û Şorişê Rojawanî kenê hedef.

Keyeyê Resûlî serra 1940î de Vakurî ra koçê Rojawanê Kurdîstanî kerd. Keye 1957 de tewrê Partîya Demokrate ya Kurdîstanî ya Sûrîye bi. Dima ke serra 1961î de Hecî Resûl tewrê serewedaritişê Başûrê Kurdîstanî bi tewrê karanê rêxistinîye yê Rojawanî zî bi.

Hecî Resûlî qala ê rojan wina kerde: ''Wexto ke şorişî dest pêkerd Rojawan û Başûrî ra xeylêk kesî bîyî pêşmerge. Mi 4 reyan Mela Mustafayî reyde pêvînayîşî kerdî. Mi xeylêk hetkarî daye şorişê Başûrê Kurdîstanî. Mi vatêne 'ma seba kurdayetîye kenê.' Merg xemê ma de nêbi. Rejîmê Sûrîye ma ser o teda kerdêne la ma reyna zî PDKyî rê kar kerdêne. Ez 6,5 serre zîndan de menda. Serra 1981î de ez reyna tepişîya û ez di serran zîndan de menda. Serra 1985î de mi Apo nas kerd û înan ra hes kerd. Apogîrî merdimê şerwan û fedakarî bîyî. Laj û 6 birazayê mi mîyanê PKKyî de şehîd bîyî. PKKyî se vatêne o kerdêne. PKKyî Şingal û Rojawan xelisnayî.

La PDK û pêşmergeyî bazirgan ê. Eke pêşmergeyan şer bikerdêne Kerkûk zî Şingal zî do bixelisîyayêne. Ê hetkarê dewleta tirke yê. Tirkîya ma rê vana terorîst. Kam ke hetkarîya Tirkîya bikera o terorîst o. PDK kurdan rê îxanet keno. ENKS zî dişmenî reyde bîyo yew. Eke ENKS yewîye wazeno wa seba kurdan bixebito. Wa kes nêvajo 'vakurijî Rojawanî ra vejîyê.' Cayê pêro kurdan Rojawan de esto. Wa têna cerg û bêbextî mîyanê ma ra vejîyê.''