Şar û bawerîyê Rojawanî ameyoxê xo sîstemê perwerdeyê pirziwanî ser o awan kenê. Sîstemê perwerdeyî rîxmê hêrişanê giranan zî wextêkê kilmî de morê xo da binê serkewtişanê girîngan.

Sîstemê perwerdeyî yê Rojawanî rîxmê xeylêk hêrişan de zî wextêkê kilmî de ser kewt. Rojawan de heta sinifa 3. wendekarî pê ziwanê xo yê dayîke perwerde vînenî, sinifa 4. ra dima zî dest pê musayîşê ziwanêkê bînî yê herême kenê. Sinifa 5. de zî ziwanêko xerîb mufredat de ca gêno.

Rojawan de bi temamî 790 wendekarê dibistana verêne, mîyanêne û lîseyî estê. Termînê 2019-2020î de semedê îşxalê dewleta tirke yê vera Rojawanî û vîrusê Korona ra di rey mabên ame dayene perwerde.

Komîteya Perwerdeyî ya Rojawanî do çarçewa bernameyê bi nameyê ''Dibistana Keyeyî'' de hewteyê bêrî de Rojava TV ser o dest pê weşanî bikera.

Vervatoxê Komîteya Perwerdeyî ya Kantonê Qamişloyî Menan Mihemed Emîn û endamê Komîteya Perwerdeyî yê Kantonê Qamişloyî Goran Şakirî ANFyî rê qala sîstemê perwerdeyî yê Rojawanî kerde.

Menan Mihemed Emînî vat: ''Ma pê Şorişê Rojawanî şorişêko cîya kerd. Bo zî şorişê perwerdeyî bi. Ma hêverî xo rê perwerdeyê bi ziwanê dayîke sey esas girewt. Wexto ke rejîm serdest bi, no mumkîn nêbiyêne. Rojê zor û zehmetî bîyî, la ma isrardar bîyî. Dima ma her serre gamê neweyî eştî û bîyî pîl.''

Goran Şakirî zî ard ziwan ke înan perwerdeyê bi ziwanê dayîke de israr kerd û vat: ''Ma waşt ke tarîxê xo, kulturê xo, folklorê xo û zanistîya xo bi ziwanê dayîke bimusê. Destpêkê şorişî de êyê ke berê dibistanan şikitê û perwerdeyê kurdkî da destpêkerdene embazê ma yê cinîyî bibî. Verê cû merdiman bi nimitkî keye de perwerdeyê kurdî dîyêne, pê şorişê perwerdeyî wextêkê kilmî de bi hezaran mamostayî ameyî perwerdekerdene.''

Menan Mihemed Emînî zî eşkera kerd ke ê perwerdeyê pirziwanî, pirkulturî ser o vindenê û înan bingeyê xo neteweyê demokratîkî ser o awan kerd. Emînî vat: ''Ma têna kurdkî nê, pê sûryankî, erebkî zî perwerde danê.''

Goran Şakîrî da zanayene ke înan mufredat goreyê neteweyê demokratîkî, tarîxê herême, kultur, folklor û ameyoxê herême amade kerd. Şakîrî vat: ''Sîstemê perwerdeyê ma yeno qebulkerdene. Ma ziwanê xo çewî ra bi zorî nêdanê musnayene. Xora ma zaf dejî antî coka ma do qet qebul nêkerê ke merdimê binî nê dejî biancê.''

Menan Mihemed Emînî peynîya qiseykerdişê xo de wina vat: ''Ganî ma seba sîstemê perwerdeyî yê Rojawanî stratejîyêka wextderge amade bikerê.'' Goran Şakîrî zî da vat: ''Xeyalêkê ma esto. Eke ma seba dîyalektîkanê kirmanckî, sorankî, hewremankî zî zanîngeh û akademîyanê Rojawan de beşan abikerê hînî no xeyalê ma do bêro ca. Seba naye projeyê ma estê. Eke şer û hêrişî tayêk vinderê ma wazenê naye bikerê.''