Hêrişê îşxalî yê dewleta tirke yê vera Başûrê Kurdîstanî û qetilkerdişê Denîze Poyraz Qamişlo de bi çalakîyêke ameyî protestokerdene.

Bi seyan kesê ke Çatrayîrê Xelîcî de ameyî têhet hemkarîya PDK ya dewleta tirke û qetilkerdişê Denîze Poyraz protesto kerd. Şarî fotografê şehîdan kiriştî û xoverdayîşê gerîlayan selam kerd. Dima ra Taxa Kornişî de mîtîngêk ame kerdene.

Îdarekaranê Têgêrayîşê Komelê Demokratîkî (TEV-DEM)  ra Ayîd Îbrahîmî ke tîya xîtabê şarî kerd, vat: ''Domanê nê şarî senî ke Garê de serkewtiş fîna dest ewro zî vera dewleta tirke koyanê Kurdîstanî de tarîx nusenê. Dewleta tirka ke çîyêk dest nêfîna PDKyî şuxulnena. Hêzê PDKyî sey mertalî dewleta tirke pawenê. Na xayînîye serranê 90an ra yena kerdene. Ganî PDK hinî pawitişê dewleta tirke caverdo.''