Çeteyê DAÎŞî ke sere de dewleta tirke xeylêk hêzê herême paştî danê ci 15ê êlula 2014î de hêrişê Kobanê kerd. Çeteyanê ke 350 dewê Kobanê fînayî dest hêrişê merkezê bajarî zî kerd. Hêrişê ke bi aşman dewam kerd hêzanê YPG-YPJ ci xoverdayîşo tarîxî da. 26ê çeleyê 2015î de DAÎŞî Kobanê de derbeya tewr pîle werde. No binkewtiş bi destpêkerdişê vînîkerdişê çeteyan. Eynî wextî nê maneyê paştgêranê çeteyan zî şikit.

Binkewtişê DAÎŞî ra dejo tewr pîl zî dewleta tirke ya fermandarîya çeteyan kena, ant. Planê Tayîp Erdoganî ke vatêne 'Kobanê kewt do bikewo' pûç vejîyayî. Dewleta tirka ke binkewtişê çeteyan zaf sero tesîr kerd pîya bi çeteyanê DAÎŞî 25ê hezîrana 2015î de hêrişê Kobanê kerd. Nê hêrişî de zafê înan cinî, doman û extîyarî 233 sîvîlî ameyî qetilkerdene û bi seyan zî birîndar bîyî.

Dewa Berxbotanî yê Kobanê ke 27 sîvîlî tede ameyî qetilkerdene  pê welatperwerîya xo yena naskerdene. Dewa ke destpêkerdişê şorişî ra mîyanê têkoşînî de cayê xo gena şerê vera Cebhed El Nusra û DAÎŞî rolêko xurt kay kerd. Têna wextê Kobanê de nê wextê Serêkanîyê û Minbicî de vera çeteyan têkoşîn kerde. Verê qirkerdişî dewa Berxbotanî de vera çeteyan 30 şehîdî ameyî dayene.

Çeteyanê DAÎŞî 25ê hezîrana 2015î de di hetan ra hêrişê Kobanê kerd. Yew grûbe Bêrê Murşîd Pinarî ra qismê bînî hêrişê dewa Berxbotanî kerd. Hêriş de zafê înan cinî,doman û extîyarî 27 sîvîlî ameyî qetilkerdene. Dayîka Eyşe  ya ke qirkerdiş de lajêkê xo vînî kerde  qala a roje kerde.

Dayîke Eyşe vat: ''Ez werişta paşîf, ez ewnîyaya verê berê ma xeylêk wesayîtî ravêrene.  Dima ra guleyî teqayî.Lajê mi vat 'şirê zere çeteyî ameyî' mi se kerd o nêame zere, vat ez do heta peynî xover bidê. Ez û tornê xo şîyî zere. Hîrê kesî ameyî zere, mi tornê xo ma xo nimit, tarî bi înan ma nêdîyî. Dima ra şîyî keyê cîranê ma û 7 kesî qetil kerdî. Dima ra lajê mi zî verê bêrî di kişt.  Gama ke embazî ameyî ê remayî.''

Mihemmed Hebiba ke qirkerdiş de mêrdeyê ci merd aye zî nê vatî: ''25ê hezîrane semedê ma rojêka tarî bî. Seba ke çeteyî bin kewtî semedê girewtişê qesasî hêrişê Kobanê kerd. Înan waşt ke qesasê vînkerdişê DAÎŞî dewanê Kobanê ra bîgêrî. Aşma Remazanî de her hetî ra hêriş kerdêne. Şarê dewe ke weriştbi paşîf vera çeteyan xoverdayîş kerd. Pîya bi mêrdeyê ma keyeyê ci ra çar kesî şehîd bîyî. Dewijan pîya bi şerwananê YPG û YPJyî vera çeteyan şer kerd û çeteyî dewe ra vetî.