Hêzanê Sûrîyeya Demokratîke (QSD) derheqê hêrişê çeteyanê DAÎŞî yê vera Zîndanê Sînaa yê Hesekê û Hemelaya Gurzê Şaran a ke vera nê hêrişî ameye kerdene de eşkerayîye daye.Eşkerayîye de nê ameyî vatene:

''20ê çeleyê 2022yî de terorîstanê DAÎŞî vera Zîndanê Sînaa yê Hesekê yo ke bi hezaran çeteyê DAÎŞî tede yê hêrişo hîra û plankerde kerd. Xeylêk bombayê ganîyî yê teberîra tewrê ci bîyî. Verî verê zîndanî de wesayîto bombabarkerde ame teqnayene û dima ra hîrê hetanî ra hêriş ame kerdene. Verê zîndanî de zî kamyonêkê çekan ame cakerdene ke çeteyê ke vejîyenê teber wa cade çeke bigêrê. Eke no plan ser bikewtêne înan do hêrişê taxanê Xiwêran û Zihûrî û nûqtayanê Îdareyê Xoserî bikerdêne. Plan wina amebi kerdene. Tay keyeyanê Xiwêran û Zihur de zî amadekarîya xo kerdîbî.

Têkoşîno qehremankî

La sere de şerwanê ma yê ke zîndanî pawenê hêzanê ma bi hewayêkê qehremankî vera nê hêrişan têkoşîn kerd. Îdarekaranê asayîşê zîndanî ra embazê ma Cemal Kobanê û Akîf vernî de  qehremankî şer kerd û şehîd bîyî. Nê embezan verê planê çeteyan girewt ke lezabez rayra meşorê. Dima ra hêzê ma yê QSD û Asayîşî yê ke herême de bî cade mudaxale kerd, bi hewayêkê rêxistinkerdeyî dormeyê zîndanî girewt. Banê unîversîte yo ka pabesteyê zîndanî yo o zî gerîya binê ablûqa. Tay çeteyan dês qule kerdbi û ravêrtbî unîversîte. Nê semedî ra dormeyê ûcayî zî gêrîya.

Hêrişo plankerde

Bado ke taxê dormeyî gerîyayî binê kontrolî hêzanê ma dest pê hêrişî kerd. Çarçewa Hemleya Gurzê Şaran de vera DAÎŞî hem dormeyê zîndanî hem zî Hesekê de hem zî herêmanê sey Dêra Zorî û Reqa de operasyonê pakkerdişî dîya destpêkerdene. Hêzê QSD û Asayîşî bi tewirê pîsporî û bêtersî şîyî çeteyan ser û zafê nînan mirnayî. Reyna zîndan de zî tay çeteyanê ke çeke girewtbî ameyî mirênayene. Tewr peynî heme tepişteyî reyna gerîyayî binê kotrolî û şawîyayî yewna zîndanî. Hêzê ma zaf baldar têgêrayî ke wa şarê ma û domanê çeteyanê ke zîndan de yê zirar mevînê. Şerwananê ma yê pawitişî yê ke binê fermadarîya embaz Cemal Kobanê de têkoşîn kerd planê çeteyan pûç vete. Bêşik no palnêko normal nêbi. Plano organîzkerde bi. Goreyê zanayîşanê ke ameyî girewtene û îfadeyê serçeteyan eke no plan ser bikewtêne sey hewayêkê hemwextî do taxanê bînan Hesekê hem zî Hol, Şedadê û Dêra Zorî de hêrişî biameyêne kerdene. DAÎŞî bi nê 'Xîlafetê Dewletê Îslamî' yê 2. do îlan bikerdêne. Bi nê hêrişî ame waştene ke vera herême hêrişo pîl bêro destpêkerdene. Sey Baxozî reyna vera hêzanê ma bin kewtî. QSDyî yî reyna îradeyê xo fîna çiman ver û semedê şaranê herême ruhê serekwtişî aferna, hêvîya şaran betal nêvete.

Rolê Tirkîya

No hêrişo plankerde yê DAÎŞî bi. Goreyê zanayîşan ke ma fînayî dest tay çeteyî herêmanê binê îşxalî yê sey Serêkanîye û Girê Sipî tay zî Iraqî ra ameyî. No hêriş teberê sînorê Sûrîye de ameyo plankerdene û koordînekerdene. Badê serekwtişê Baxozî DAÎŞ sey cografya ame çînkerdene la çeteyan goreyê şertanê neweyan xo newe ra ganî kerd. Tim cehdkerdişê hêrişê înan estbî û hêzanê ma tim vera înan têkoşîn kerd. Eke DAÎŞ hema eşkeno payan ser o vindero eşkera yo ke tay hêzê herêmî û dewletî paştî danê ci. Rolê dewleta tirke na bebete de tewr muhîm o. Hêrişê çeteyanê DAÎŞî yê vera Sînaa de zî berpirsîyarîya dewleta tirke zaf a. Hêrişê dewleta tirke yê vera Rojawanî hem moral danê DAÎŞî hem zî firsetê xo rêxistinekerdişî dano ci. Warê Serêkanîyê û Girê Sipî açarîyayî waranê rexistinkerdiş û perwerdekerdişê DAÎŞî. Xora zafê hêrişkarê vera Zîndanê Sînaa nê herêman ra ameybî. Dewleta tirke na babete de berpirsîyar a.

Meseleya Kampa Holî

Hetê bînî ra mabênê QSD û Hêzanê Koalîsyonê Mîyanneteweyî de vera DAÎŞî hemkarîya hole esta. Vera DAÎŞî têkoşîn dewam keno la çeteyî û merdimê înan ê ke Kampa Holî de manenê barê înan têna milê QSD û Îdareyê Xoserî rê ame verdayene. Nê hêrişê peyênî ramojna ke DAÎŞî semedê heme dinya tehluke yo. Reyna ame vînayene ke ganî koalîsyonê mîyanneteweyî her hetî ra zafêr paştî bido QSD û Îdareyê Xoserî. Badê nê hêrişî reyna ame famkerdene ke Kampa Holî ke sey bombaya ke pîmê ci ameyo antene ya, ganî ci rê çareserîya mendîye bêro. Hetê bînî ra bi hezaran çeteyê DAÎŞî yê ke tepişteyê ganî bêrê muhakemekerdene. Semedê nayî zî mehkemeyê mîyanneteweyî ganî bêrê ronayene.

Weşûwar bi Hesekê

Şaranê Hesekê çarçewaya operasyonê pakkerdişî de zaf paştî daye hêzanê QSDyî Asayîşî û pîya bi înan taxe û bajarê xo pawitî. Bi paştdayîşê înan serkewtiş ame destfînayene. Coka ma semedê hîsgêrîye û fedakarîya înan vanê weşûwar bê . Reyna Koalîsyonê Mîyanneteweyî zî paştî daye ma. Ma înan rê zî spas kenê.

Şehîd û şerwananî ameyî selamkerdene

Şerwananê QSD û hêzanê Asayîşî bi fedakarîya pîle keyf û planê DAÎŞî qirrika ci de verdayî. Şerwanê ma yê delalî şehîd bîyî. Na çarçewe de ma şehîdanê xo yê Hemleya Gurzê Şaran yad kenê û sozê serkewtişî û pawitişê herême danê şarê xo. Heme fermandar û şerwanê ke tewrê na hemle bîyî ma înan selam kenê. Ma veng danê heme rayrapêroyîye û hêzanê eleqedaran seba ke wa wehşetê DAÎŞî peyser mero ganî zafêr paştî bidîyo Îdareyê Xoserî yê Rojawanî û QSD û şarê herême. Hetkarîya sîyasî, leşkerî û ekonomîkî ya semedê Îdareyê Xoserî û QSDyî do verê DAÎŞî bigêro. Bi qala kilme DAÎŞî waşt newe ra wirzo payan ser la hêzanê ma bi ruhê xoverdayîşê Kobanê reyna maneyêê înan şikit. Serkewtişo ke bi ruhê serkewtişê Kobanê ame dest fînayene ma heme şarê xo rê dîyarî kenê. Çarçewaya Hemleya Gurzê Şaran de vera çeteyanê DAÎŞî Dêra Zor û Reqa de operasyonî dewam kenê.

374 çeteyê DAÎŞî ameyî mirênayene

Çeteyanê DAÎŞî 77 kesê ke sey persenolê zîndanî û asayîşê zîndanî de gureyayêne şehîd kerdî. Operasyonanê 7 rojan ê Zîndanê Sînaa de 40 şerwan û 4 hemwelatîyî şehîd bîyî. Çarçewaya Hemleya Gurzê Şaran de pêro pîya 121 personel û şerwanê ma yê ke bi hewayêkê qehremankî şer kedêne şehîd bîyî. Ma şehîdanê xo yê qehremanan reyna bi nimet yad kenê. Operasyonan de 374 çeteyê DAÎŞî ameyî mirênayene.''