QSDyî pare kerd ke bira ambargoyî ya Amerîka ya vera cerganê Ehrar El Şerqîye gamêka pozîtîf a. QSDyî îfade kerd ke ganî cergê ke vera înan ambargo yeno caardene bêrê muhakemekerdene.
Merkezê Îrtîbatî û Çapemenîye yê QSDyî derheqê bira ambargoyî ya Wezaretê Xezîne ya Amerîka de eşkerayîyêke daye. Wezaretê Xezîne ya Amerîka vizêr eşkera kerdbi ke ê do vera cerganê Ehrar El Şerqîye yê dewleta tirke semedê sûcanê înan ambargo bîyarê ca. Koma cergan a Ehrar El Şerqîye sîyasetmedara kurde Hevrîne Xelef zî qetil kerdbi.
Eşkerayîye de ame vatene ke cerganê Ehrar El Şerkîye herême de xeylêk sûcê şerî kerdî û nê cergî pabesteyê Erdoganî yê.
QSDyî ard ziwan ke ê na bire sey gamêka pozîtîfe ercnenê. QSDyî vat: ''Ma na game sey destpêkerdişê tehqîqatêkê hîrayî hyê vera sûcdaran ercnenê ke herême de xeylêk qirkerdişî kerdî. Ma venga pêro komelê mîyanneteweyî û rêxistinanê heqanê merdiman danê ke seba muhakemekerdişê sûcdaran û seba caardişê edaletî bixebitê.
Tarîxê Ehrar El-Şerqîye pê sûcan dekerde yo. Înan sîyasetmedare Hevrîne Xelef û xeylêk kadroyê weşîye û sivîlî qetil kerdî. Ganî nê sûcdarî mehkemeyanê mîyanneteweyîyan de bêrê muhakemekerdene.''
